Manchester Derby : Mou Vs Pep
Manchester United striker Zlatan Ibrahimovic chuan, "Ferrari kar a lei a, Fiat angin a khalh si," tiin Barcelona-a Pep Guardiola chhawr danah a lawm loh thu a sawi tawh a, Swede striker hian, "Mourinho-a'n room a tih en chuan Guardiola chuan parda a zar ang," tiin manager pahnih chuan ze dang daih an neih thu a sawi.
Vawiin tlai dar 5:00 hian Old Trafford-ah Manchester Derby khelh a ni dawn a, Star Sports 2-ah a en theih ang. Pa ṭawng tam Zlatan vangin derby en châk an tam ang a, an sawi ber erawh Pep Guardiola leh Jose Mourinho te an ni. Manager pahnih vang hian tun hma zawng aiin derby boruak a alh ṭha a, khawvelin a ngaihven pawh hi a mak lo - nipui bazarah pound maktaduai 150 bawr vel ve ve an hmang thei tlat!
Ibra a ṭawng
Kum 34-a upa Zlatan Ibrahimovic chuan, "Kan naupan lai khan Mou-rinho nen kan nomawi kan chawi tawh a, tlema kan upat hnuah kan champion dun leh ang, kan tar hunah ni loin. Ani hian champion duhna thinlung a pu a, hnehna a chan theihna turin thutlukna a siam ṭhin a, hei hi kan inanna pawh a ni. A kalna hmun apiangah a champion thei a, kei pawhin ka kalnaah nomawi ka chawi ve zel a, Champions League-ah Porto a champion pui theih avangin pa danglam a ni," tiin Mourinho fak pahin amah a infak tel bawk.
Swede striker Zlatan chuan, "Mourinho tan chuan ka theihna zawng zawngin ka khel ang," tiin Portuguese tan a inpumpek thu a sawi tel bawk. PSG aṭanga United zawmtu Zlatan hian Mourinho hi match li khelh sak tawhin goal li a khung sak a, vawiin tlai pawh hian England Under 21 tana
hattrick siamtu Marcus Rashford pawh-in bench a mawi mai a ṭul dawn a ni.
Mou chungah Pep
Pep Guardiola leh Jose Mourinho te'n an match hmasa pathumah hnehna an chang nghal a, season ṭan hmaa champion rinkai tiha an sawi City leh United te'n belhchian an dawl nghal hle.
Manager pahnih inkarah Pep chungnung zawkin vawi 16 an inhmachhawn tawhah vawi sarih a chak zawkah a ṭang. Manager pahnih intawn tawhnaah hian Pep-a hote hian match tinah vawi 684 in pass kual ang an ni a, Mourinho nauten ball vawi 283 vel chiah an inpe kual thung. Manchester Derby-ah pawh hian Red Devils hian City player-te ball inpe kual an um leh tura ngaih a ni.
United manager hlui Louis van Gaal kha goal nawr na si lo a, awmze nei loa ball inpe nasa lutuk tiin an sawi ṭhin Dutch manager hnuaiah United-in 58.5% ball possession an nei a, Premier League club-ah ball an chang tam ber. Tunah erawh City-in chawhrualin 67.2 % ball possession ngah ber an ni a, United-in (52.9 %) an tluk pha lo hle.
Vawi 171 an in-tawn-naah erawh Uni-ted hian vawi 71 hnehna an chang a, City hi vawi 49 chakin vawi 51 an inhnehtawk. Chutih-rualin Old Traf-ford-a an intawn hnu-hnung pangaah City vawi thum ngawt an chak a, United vawi khat chiah an chak. Nikum October thla kha an intawn hnuhnun ber niin goal awm loin an inhnehtawk.
United an dam
Armenia tana a inkhelh ṭumin Henrikh Mkhitaryan inhliam mah se derby-a inlan thei dinhmunah a ding. Nizan press conference-ah Mourinho chuan, "Minute 90 khel turin a inpeih ka la ti lo a, mah se Henrikh hi mamawhna a awm a nih chuan chhawr theih a ni. Player zawng zawng hman theih turin an dam," tiin a sawi a, inhliam vanga England tana inlan lo Luke Shaw pawh a dam tihna a ni.
Borussia Dortmund aṭanga United zawmtu hian inkhel bul a la
ṭan lo a, league match hnuhnung bera Hull City an hneh ṭumin khelmual chhungah player danglam a nih zia a lantir avangin Armenia captain inhliam hian ngaihven a hlawh.
Portuguese manager hian South American player Antonio Valencia, Sergio Romero leh Mar-cos Rojo ten England a thlawk kal nghal tur thlawhna an neih theih zarah a hunah tak an training vek thu a sawi lang bawk.
Aguero thlakna Sane?
Pep Guardiola chuan goalkeeper thar Clau-dio Bravo chu a inpeih tawh thu a sawi a, Leroy Sane pawh tun dinhmuna City player
ṭha ber a nih thu a sawi lang bawk. Captain Vincent Kompany erawh training nei leh tawh mah se fimkhur vang-in chhawr a tum lo. Spanish manager-in Sane a fak danah Germany winger hian bul a ṭan hmel a, hrem vanga khel thei lo tur Sergio Aguero thlakna turah a ngaih theih.
City manager Pep chuan, "Kan khelh dan turah kan chiang a, team ṭha tak lakah inkhel thunun kan duh. Tun season-a United inkhel hi ka en vek a, match tinah keini ang thoin hma an sawn a ni. United kan hmachhawn hunah hian kan tihṭhat chhawm nungin kan tihsual erawh siam ṭhat kan tum ang," tiin ball chang tam zawk nih an tum tih a sawi.
Aguero vanga buaina
Hrem vangin Sergio Aguero a tel dawn lo a, Mourinho erawhin Argentine forward tel loh vangin an hmabak a harsat sawt thu a sawi. Portuguese coach Mourinho chuan, "Aguero awm loh vang hian a harsat phah zawk. Argentine forward hi awm se chuan an khelh dan tur kan hre lawk dawn a, tunah erawh an khelh dan tur hriatthiam a har hle. Tunah chuan Iheanacho, Sterling leh Silva te zinga tu emaw ber false nine a hmang thei dawn a, keini tan chuan an khelh dan tur rinlawk thiam a pawimawh dawn a ni" tiin a ngaihdan a sawi.
Mou vs Pep
Manchester City manager Pep Guardiola chuan, "Vawi tam tak ka sawi tawh, Mourinho hi ka zah em em a ni. Ka thawhpuite hneh
aṭangin thil tam tak ka zir a, ani hnen aṭang pawh hian ka zir hnem hle. Kan inkar buaina hi chu thuhthar thehdarhtute lamin uchuak taka an tihdarh a ni a, kan tan dan theih a awm lo. Mourinho hi ka coach a ni a, Sir Bobby Robson-a hnuaiah assistant coach a ni ṭhin. Real Madrid leh Barcelona a kan hun tawp lamah erawh buaina chu a awm ngei a, mah se tunah erawh engkim a ṭha tawh. Premier League manager inhmuhkhawm ṭum pawhin Ronald Koeman leh Tony Pulis te nen ṭha takin kan inkawm ho a ni," tiin thuthar thehdarhtute chu buaina siamtuah a ngai.
Spanish manager hian Mourinho nen buaina an neih loh thu sawi mah se khelmual chhungah erawh chak zawk nih an duh ve ve a, Ibra pawhin Barca-a amah chhawr ṭha duh lotu Pep hote hneh aia châk a nei lo ang. Manchester Derby boruak a sang, inkhelh ṭan hma chhan pawh buaina chhuah duh loh vang a ni a, inkhel a hmuhnawm ang.
Guardiola Vs Mourinho
Manchester Derby hma hian Pep Guardiola leh Jose Mourinho te hi vawi 16 an lo inhmachhawn tawh a, Spanish manager hian vawi sarih hnehna changin Portuguese manager hi vawi thum chiah a ṭan ṭha zawkah a ṭang a, vawi ruk dangah erawh chungnung zawk an awm lo.
Barcelona vs Inter Milan
W D L
Pep 2 1 1
Mou 1 1 2
Barcelona vs Real Madrid
W D L
Pep 5 4 2
Mou 2 4 5
Bayern Munich vs Chelsea
W D L
Pep 0 1 0
Mou 0 1 0
Penalty-ah Pep enkawl Bayern 5-4 in an chak