Zo United-in Chhinga Veng an beng dai

Mizoram Premier League kai thar Chhinga Veng FC-in an khelh ṭhat an chhunzawm thei lo. Ningani zan khan Lammualah Zo United nen goal awm loin an inhnehtawk.

Zo United-in point hlawh chhuak turin goal an chhuah lo a, defender Malsawma Chhangte chu man of the match-a thlan a ni.

Famkim lo

Ningani zan inkhel nung ṭha hle mah se goal a luh miau loh avang-in a hmuhnawm dan a famkim lo. Chhinga Veng forward Lal-khawpuimawia'n inkhelh
ṭan tirh lamah Zo United tlar hnung ṭhawng mah se Kelkang tlangvalin harhna a thlen nawn thei lo.

Zo United defence laia Lal-nun-puia leh Malsawma-te inkawp an khawng ṭha a, midfield-a Laldinmawia chevel a hmuhnawm. Amaherawhchu tlar hmaa awm Jesse Laldinpuia a mal deuh hret avangin Chhinga Veng keeper R. Lalhmangaihzuala'n hun chanve hmalamah hna a nei lo.

Second half-ah Zo United jersey nen Chhanrinpianga a rawn inlan a, Champhai tlangvalin a ze ngai a la hloh lo tih lantirin a hun neih goal-a pet nan hmang mah se Valrina'n a match hmasa berah goal a keng tel lo.

Chhinga Veng striker MS Dawngliana'n bench aṭangin danglamna a thlen thei lo a, Zo United tlar hnungin hun tam zawka an dah ṭhat H. Lalmuankima'n a hun ṭha neih goal zawna a pet thei lo chu pawi a ti khawp ang.

Eng nge an sawi?

Zo United coach Vanlalrova chuan, "Point khat chauh kan hlawhchhuah avangin kan lawm a kim lo a, chutih rualin point kan neih ve tak avangin inrintawkna kan neih belh sawt ang. Kan goal nawr a la na tawk lo a, kan fitness la ṭhat tawk loh vang pawh a ni thei ang. Engpawh nise point thum kan hmuh thuai kan beisei," tiin a sawi.

Rova hian Zo United ṭantute chungah lawmthu a sawi a, an thawhpui Chaltlang Lily Veng cultural club-te ṭawiawmna chuan player-te a tihphur thu a sawi tel bawk.

Chhinga Veng coach Lalrem-tluanga chuan, "Kan player-te'n kan khingpui an dah hniam ve ngawt a, kan khelh danah a lang chhuak a ni. Set piece kan pet danah pawh inrawlh lo tur an inrawlh ve a, hrem ngai chu ka hrem ang. Khelmual chhunga inthununna lekkawh hi ka duh dan a ni a, player mimala chet-
ṭhat ai chuan team anga khelh ka duh. Tun aia ṭha zawka khel tura min beisei a nih pawhin pawi kan ti lo, tum sang tak neih hi kan duh a ni," tiin a sawi.

Ngaihnawm

• MPL5-a goal luh lohna inkhel hmasa ber a ni

• Chhinga Veng winger Lalramliana Varte leh a u Zo United winger Laldinliana Varte te'n inkhel bul an ṭan ve ve.

• Chhinga Veng FC-in MPL-ah goal an la chhuah lo a, MPL5 ṭan hma khan I Day Football leh MFA Super Cup-ah match nga khelin goal 14 an chhuah.

• Zo United-in MPL season ṭantirh match hmasa pahnihah point an hmu lo a, season thum chhung chu match hmasa pahnih chak loh zawn an nei tawh lo.

Tute nge inlan?

Zo United (4-2-3-1) : LK Hmangaihzuala; Hmingthanzauva, Lalnunpuia Pachuau, Malsawma Chhangte, R. Lalthantluanga; Dominic Lalruatfela (Chhanrinpianga 58'), C. Laldinmawia; Vanlalhmangaiha (Lalbiakkima 84'), Lalṭhazuala (Vanlalremsanga 80'), Laldinliana Varte; Jesse Laldinpuia.

Chhinga Veng (4-4-2) : R. Lalhmangaihzuala; Dinthangpuia, R. Laldinliana (MS Dawngliana 62'), Vanlalthanga; Lalramfelpuia; H. Lalmuankima, Paul Ramfangzauva, Joseph Lalnunpuia, Lalramliana Varte (Vanlallawma 76'); Lalkhawpuimawia, PC Vanlalhmangaihzuala (Lalchhanchhuaha 38').(Lalruatfela Zote 72'), Rochhingpuia; Isaac Lalruatpuia (Lalmuanzova 90'), Lalrammawia, Ṭhasiama.