Big Sam kaihhruai Baggies chak lo nghal

West Brom-in manager thar Sam Allardyce hnuaia an match hmasa berah Aston Villa 3-0 in an hneh lo. Hawthorns-ah Villa tan Anwar El Ghazi-a'n goal hnih a khung a, Bertrand Traore-a'n goal khat 

a khung ve bawk.

El Ghazi hian minute ngana lekah Villa tan a khung a, Baggies captain Jake Livermore chu minute 37-naah hnawhchhuah a nih zui avangin Big Sam-a hoten mikhual an ngam lo hle. West Brom hian point sarih chauh hmuin table-ah 19-naah an awm.

English manager Sam Allardyce hian 2008/09 season khan 19-naa awm Blackburn Rovers chu chhanhimin 15-na a nihpui. 2015-16 season khan Sunderland chu 19-na aṭangin 17-naah a hlangkai a, Premier League khel zel turin Black Cats a chhanhim.

Sunderland zawh hian 2016-17 season-ah Big Sam hian Crystal Palace a enkawl a, 17-naa awm chu season tawpah 13-na a nihpui. Hemi zawh season-ah Everton chu 13-na aṭangin pariatnaah a hlangkai bawk. Big Sam hian vawi khatmah a team enkawl a la relegate pui lo a, hei hi Baggies pawhin an rin ngamna chhanah a ngaih theih.

West Brom hian manager Slaven Bilic chu Manchester City laka point an hlawhchhuahk chungin an ban a, Big Sam-a chungah rinna an dah sang hle. Amaherawhchu Baggies hian Villa keeper Emiliano Martinez an tibuai pha lo a, Sam Allardyce hian Premier League club pariat enkawl tawhin kum 20 chhungin tun hi a match hmasa bera a vawi hnih chak lohna chauh a ni.

Baggies boss Big Sam chuan, "Kan khingpui leh tur a awlsam dawn. Kan theihna zawng zawng kan chhuah ang," tiin a sawi. West Brom hian Anfield-ah Premier League hmahruaitu Liverpool an hmachhawn dawn a, English manager hian tumahin chak an beisei dawn loh avangin pressure an nei lo tih a sawi tumnaah a ngaih theih.