UEFA-in club lian an hlau?

Europe-a football league 24 intelkhawm pawl European Professional Football Leagues (EPFL) chuan tun hnaia Champions League kalphung thlaktu UEFA chuan Europe club liante a hlauh luatah a duh danin ke a pen ngam lo niin an sawi.

UEFA chuan August thla tawp lam khan Spain, Germany, England leh Italy chuan Champions League playoff khelh ngai tawh loa Europe club inelna sang berah hian team pali an thawh theihna tura ruahmanna an siam thu an puang a, 2018-19 season aṭanga hman
ṭan tura tih a ni. UEFA-in hetianga thutlukna a siamchhan hi Europe club lian ṭhenkhatin sum tam zawk an hmuh theihna tura European Super League din chungchang an sawi rik vang a ni.

EPFL head Lars-Christer Olsson chuan, "UEFA hian a zahawmna hlohin club lian tlemte chu khumpuiah a kaipui a ni," tiin Europe football thuneitu sang ber chuan club tenau zawkte ngaihthaha thutlukna an siam thu a sawi a, sum hmuhna tura mi hausa mutpui ṭhin hmeichhe buan chak lo nen UEFA a khaikhin.

Kum 2003-2007 in-kara UEFA chief executive dinhmun lo chelh tawhtu Olsson chuan sawi chhunzawmin, "UEFA hi ṭul loah a hlauthawng mai mai a ni. Hetiang thutlukna liantham a siam dawn chuan club zawng zawng dinhmun tur a ngaihtuah tur a ni a, UEFA hian an ruahmanna neih tawh hi uluk taka thlir nawn leh turin ka ngen a ni," a ti.

UEFA hian ram lian pali aṭanga Champions League khel thei tur club a tipung mai a ni lo a, Europe football inelna sang bera sulhnu nei
ṭha club apiangin sum an dawng hnem tawh dawn a, hei hi EPFL chuan an duh lo bawk a ni.