Emirates Stadium-ah Laipui thar fiahna
Zanin hian Arsenal chuan tun season-a a vawi hnih nan Emirates Stadium-ah Premier League match an khel dawn a, Gunners forward Theo Walcott leh Alex Oxlade-Chamberlain te chawr chhuahna Southampton nen dar 7:30-ah an inkhel ang.
Gunners hi Liverpool lakah 4-3 in an mualpho nghal a, hemi hnu hian Leicester City nen inhnehtawkin Watford an sawp leh tawh. Arsene Wenger-a'n club dang elpha turin pound maktaduai 50 chuang sengin Shkodran Mustafi leh Lucas Perez te an lalut a, London club ṭantute an sawi sang ve thei ta. Valencia defender hlui Mustafi hian Rob Holding thlakin inkhel bul a ṭan tawh tura ngaih a ni a, hetihlai hian striker Olivier Giroud a inpeih tawh avangin Perez erawh a inlan a nih pawhin bench-ah a ṭhut phawt a rinawm.
North London club hian an fachuam Jack Wilshere chu Bournemouth-ah loan-in an kaltir a, midfielder Aaron Ramsey chu malpui na vangin an hahchawlhtir a la rinawm - Granit Xhaka mawhphurhna a sang chho zel dawn niin a lang. Ramsey bakah hian Per Mertesacker, Gabriel Paulista, Danny Welbeck leh Carl Jenkinson te chu an hliam a la dam lo vek.
Arsenal manager Wenger-a'n kuminah a zia thlakin player thar lak luh nan pound maktaduai 100 vel bawr a hmang a, a sum hman zat hi ṭhatpui tham a tling. Chutih rualin Manchester khaw club pawisa hman zat erawh an tluk pha lo. Gunners hian league match thum khelh tawh aṭangin point li an hmu tawh - Chelsea, Man City leh United ten point kua an neih tawh avangin champion tan point hloh a thiang lo.
Arsenal khingpui tur Saints boss Claude Puel chuan ban na vanga England squad aṭanga inhnukdawk goalkeeper Fraser Forster chu inkhel tura a dam thu a sawi. Hetihlai hian club player man to ber Sofiane Boufal erawh khup na vangin a la inkhel thei a beiseiawm loh a, Lille forward hlui hi a inlan a nih pawhin bench aṭanga lut tur chi chauh a la ni. Sunderland nen an inkhelh ṭuma an goal neih chhun khungtu forward Jay Rodriguez chu tlar hma luahlumtu a ni leh ang.
Lloris a dam
Zanin dar 7:30 tho hian Tottenham Hotspur chu Stoke City khelmualah an lenglut dawn bawk. Spurs tana chanchin lawmawm chu goalkeeper Hugo Lloris lo let tur hi a ni. France captain hi league match hmasa bera Everton nen 1-1 a an inhnehtawk ṭumin malpui na vanga lakchhuah a ni a, Crystal Palace leh Liverpool a hmachhawn theih loh hnuah a lo kir leh dawn.
Season hmasa league-a pathumna Tottenham tan hian Lloris rawn kir dawn mah se defender Danny Rose chu malpui na vang thoin a inkhel thei dawn lo a, midfielder Mousa Dembele pawh hrem vangin a la inlan thei lo bawk. Hetihlai hian player thar Moussa Sissoko hmel kan hmuh a beisei awm thung.
Zanin Inkhel Tur
Manchester United 5:00 PM Manchester City
Bournemouth 7:30 PM West Brom
Arsenal 7:30 PM Southampton
Burnley 7:30 PM Hull City
Middlesbrough 7:30 PM Crystal Palace
Stoke City 7:30 PM Tottenham Hotspur
West Ham United 7:30 PM Watford
Liverpool 10:00 PM Leicester City
September 11, Pathianni
Swansea City 8:30 PM Chelsea
September 12, Thawhtanni
Sunderland 12:30 AM Everton