Liverpool khelmualah Foxes

Anfield zauh a nih avanga tun season-a home match la khel lo Liverpool-in zanin dar 10:00-ah an khelmuala an match hmasa ber an khel dawn a, an mikhual tur hi Premier League champion Leicester City an ni.

Liverpool khelmualah mi 8,500 tan ṭhutna siam belh a ni a, Reds manager Jurgen Klopp chuan fans tam zawkin a player-te an auh phur a beisei thu a sawi. German coach chuan, "Fans 8000 chuangin kan pung dawn tihna a ni a, fan-te puihnain hnehna ropui tak kan chan ka beisei a ni," a ti.

Klopp chuan sawi chhunzawmin, "Point li chauh kan la hmu a, result duhawm tak ni lo mah se ngui lutukna tur erawh a ni lo. Kan league match hmasa pathum khualmualah kan khel a, a harsa a ni. Season ṭantir chauh a la ni a, insiam-
ṭhatna hun kan la nei a, kan theihna sang berin kan la khel chhuak lo," tiin a naute chu ṭha zawka khel turin a beisei.

Liverpool-in midfielder Emre Can leh centre-back Ragnar Klavan te chu hliam vangin an chhawr thei dawn lo a, forward Sadio Mane chu Senegal tana a fehchhuahnaah inhliam mah se Foxes hmachhawn turin a dam tawh - Leicester tana hriat nuam lo hi Liverpool lawmna a ni.

Leicester City-in trans-fer tawp niah an club player manto ber ni turin pound maktaduai 29 man Algerian striker Islam Slimani an lalut a, Foxes manager Cluadio Ranieri chuan season hman zawh taka Sporting Lisbon tana goal 31 khungtu striker hi a chhawr theih tur thu a sawi - Reds tlarh hnung tan hna a tam sawt dawn.

Ranieri chuan inkhel tur chungchang sawi nghalin, "Liverpool hi team ṭha tak an ni a, mah se hnehna chan tumin kan kal ang. Premier League champion kan ni a, game harsa kan khel dawn tih hre mah ila tum châkawm kan ni bik lo," a ti - Foxes hian tlar hmaah Ahmed Musa, Riyad Mahrez, Jamie Vardy leh Slimani an neih miau avangin Italian manager thusawi hi Liverpool tan nuihsan chi a ni lo.