Foxes-in Mourinho hote an barakhaih

Pathianni zan khan Leicester City-in Jamie Vardy penalty leh Tottenham Hotspur defender Toby Alderweireld-a'n an lama a tihluh hmangin Tottenham Hotspur Stadium an luhchhuah a, 2-0 in hnehna an chang.

Tottenham Hotspur-in Jose Mourinho hnuaiah result ṭha neiin Premier League hmahruaitu hial ni hman mah se match hnuhnung pahnihah an elpui Liverpool leh Foxes te an hneh loh avangin panganaah an tla thla. Brendan Rodgers-a hote erawh Everton laka an tlawm hnuah an insiamṭha nghal a, pahnihna dinhmun an chelh mek.

Fimkhur takin team pahnihin bul an ṭan a, minute 45 chhungin chance hmuh tur a tlem hle. Foxes forward Jamie Vardy-a'n defender Sergio Reguilon a pet per leh Spurs forward Son Heung-min corner pet Harry Kane-a'n a  tauh over te chu goal hlauhawm deuhah a ngaih theih. 

First half tawp dawnah Spurs defender Serge Aurier-a'n ṭul lo takin Wesley Fofana a nawr thlu a, VAR hmanga ennawn a nih hnuah referee Craig Pawson-a'n penalty a pe. Jamie Vardy rawn pen chhuakin goal laiah chiang takin a pet goal a, VAR leh Vardy chu first half-a team pahnih danglamna a ni.

Second half an ṭan a, Foxes goal nawr a na chhunzawm. Minute thum hnu lekah James Maddison chuan ṭha zeta ball la lutin mawi fahranin a pet goal. VAR hmanga chik taka enlet a nih avangin Maddison-a goal mawi hi offside hmanga pawm a ni lo.

Leicester City-in goal an khung ta tho a, minute 59-naah Jamie Vardy-a'n Toby Alderweireld tauh perin Belgian defender hian an lamah a su lut. Hun tawp lamah Spurs-in an nawr let na a, amaherawhchu Kasper Schmeichel a che ṭha. Foxes keeper hian Son-a goal khung tur chu ṭha zetin a dang.

Brendan Rodgers hoten hnehna an chan avangin Krismas-ah a ṭum hnih nan pahnihna an ni a, chutihrualin season hmasa khan hun rei zawk palina chinah awm mah se season tawpah panganaah an awm. Tun season-ah chetsual tawh loh an tum ang.

Tottenham manager Jose Mourinho chuan, "Inkhelh hriat-thiam har tak a ni. Penalty leh own goal hmangin kan chak lo a, kan keeper-in save a nei lo. Chutihrualin kan khel ṭha tawk lo tih ka pawm a, an keeper Schmeichel a che ṭha bawk," tiin a sawi a, Aurier penalty chawi chu a at vang ni loin a chetsual vangah a ngaih thu a sawi bawk.

Leicester City manager Brendan Rodgers chuan, "Inkhel pumpui thlirin chak kan phu hlein ka hria. Counter attack-ah an hlauhawm ṭhin a, tun ṭumah erawh kan in veng theiah ka ngai. Team ṭha pahnih inkhel a ni a, point thum hlu tak a ni," tiin chak an phu thu a sawi.