Aizawl FC zinkawng a tawp ta
Samthang tlangval Lal-lawmkima'n a captain-na hnuaiah Army Green chu a vawi khat nan Durand Cup final a thlenpui. Nizan final hmuhnawm takah Army Green leh Aizawl FC hun pangngaiah 3-3 in an inhnehtawk a, penalty shootout-ah 4-2 in Mizo club an vanduai.
Pathianni tlai hian Am-bedkar Stadium-ah final khelh a ni dawn a, Army Green hi group stage-a Aizawl FC ngam loh Manipur club Neroca FC nen kum 1888 aṭanga khelh ṭan Durand Cup nomawi chawi an inchuh ang.
Inkhel chu
Ambedkar Stadium-ah ṭan aṭanga minute 1-na lekah William Lanunfela'n goal khungna hun ṭha nei mah se Real Kashmir lama minute 6-na leka goal khungtu Kolasib tlangval ball pet chu Army Green keeper-in a dan sak.
Army Green lamin chance an nei ve lehnghal a, goal nga khung tawhtu captain Lallawmkima'n Mizo club lamah goal khung ngei tumin shot nei mah se bar chungah a kal. Minute 23-naah Army Green lamin an hun ṭha neih goal-ah an chantir ta nge nge a, throw-in aṭanga ball kal zel chu Army tan Vikash chuan bicycle kick hmanga lo petin goalkeeper Lalawmpuia'n tih theih a nei lo.
Inngam tawk
Aizawl FC-in midfield-ah Army Green an ngam lo a, ball kang vawrh nasa mah se fitness ṭha zawk sipai footballer hmaah I Day champion player-ten an thiamna an pholang hleithei lo - mahse, Mizo club-in an hmaa ropuina inchhawp thlirin a tlawm zawk nih an tum lo. Minute 72-naah Bright Middleton Mends chuan corner aṭangin an si phurh a sut.
Mizo club an phur tulh tulh a, minute nga a liam hman chauh tihin an hmahruaina goal an khung - penalty area a Army player handball zara an penalty hlawhchhuah chu Armed Veng tlangval Lalramchullova'n harsatna nei loin a khung.
Federation Cup finalist an phur sual a, Army Green counter attack an ngam lo. Goal an khung aṭangin minute khat a liam hman chauh tihah handball vangin freekick an chawi a, Army tana pettu winger Vikram Adhikari a'n an si phurh sutna turin a khung.
Tlawm duh lo Vál
Extra time khelh a ni a, Aizawl FC player-te inrin hman hmain Army Green tan Hero-a che 'hero' a, inkhelh ṭanna hamrik ham a nih ruala an goal thumna khungin 3-2 in hma an hruai. Mizo club Aizawl FC-in tlawm duh loin minute 97-naah Bright Mends bawk inlarin Ghanaian striker hian Mizo club goal thumna khung ve lehin 3-3 in a hun a tawp.
Mizo club an vanduai
Samthang tlangval PC Lallawmkima leh Army Green tana penalty pettu dangten penalty an khung vek a. Aizawl FC lamah William Lalnunfela leh Zoramthara ten khung mah se I Day Football best player Rohmingthanga leh Lalrinzuala Khiangte ten an khung loh avangin Mizo club 4-2 in an an chak lo.
Aizawl FC-in final thleng zo lo mah se Mizo club zinga I League khel hmasa ber, Federation Cup final lut hmasa ber ni bawk club thlen chin hi a ropui tih loh rual a ni lo.
Aizawl FC zinkawng
Group Stage
29 August 2016
Aizawl FC 3 - 1 Dempo SC
AFC: Bright Mends 18', 30'; Vanlalduatsanga 61' 02 September 2016
Aizawl FC 1 - 0 Indian Air Force
AFC: Bright Mends 35'
03 September 2016
Aizawl FC 0 - 1 NEROCA
05 September 2016
Aizawl FC 1 - 0 Army Red
AFC: Bright Mends 51'
08 September 2016
Aizawl FC 1 - 1 Real Kashmir FC
AFC: William Lalnunfela 6'
Semifinal
09 September 2016
Aizawl FC 3-3 Army Green (a.e.t)
AFC : Bright Mends 72', 97' (ET); Lalramchullova 77'
Army : Vikash 23'; Vikram Adhikari 79'; Hero 91' (ET)
Penalty Shootout-ah Army Green 4-2 in an chak