West Warrior-in Lalhlima an ngam lo

Bethlehem Vengthlang FC-in H. Lalhlimpuia goal hnih hmangin Chanmari West FC an lehthal a, Mizoram Premier League Season 5-a vawi hnih chak thei hmasa ber an ni.

Nizana Lammuala inkhel hmuhnawm takah West Warrior-in Laldampuia hmangin first half-ah hma hruai mah se BVT coach Lalbiaksanga Colney-in half time a hmang ṭha a, second half-ah a rah lang chhuakin defender Lalhlima goal hnihin an changlet.

Goal ropui

BVT-in inkhel bul an ṭan ṭha a, amaherawhchu captain Laldingngheta cross ṭha tak chu PC Zosanga'n tauh fuh mah se West Warrior keeper Lalmalsawma Hmar-in a dan sak. Hemi hnu hian Zosangkima'n freekick ṭha taka petin Malsawma'n hming ṭhat nan a hmang nawn.

Chanmari West-in awmze neia goal an nawr hmasak berah goal an khung a, Dampuia'n vei lam aṭanga ball lalutin box pawn aṭangin mawi zetin a pet lut. First half-ah goal a luh belh tawh lo.

Lalhlima Show

Minute 58-naah BVT defender Lalhlima'n hla tak aṭangin freekick a khung a, Chanmari West defender R. Lalawmpuia'n a khawih kawi vangin keeper Malsawma a che lo. Goal luh hma chiaha rawn lut Lalrammuanpuia goal hmaa a hlauhawm a, Armed Veng South tlangval ball pet a hlauhawm hle.

Chanmari West tan Dampuia bawk a hlauhawm a, Danmawia cross chu West Warrior captain hian pet ṭha mah se Luangmual keeper hlui Mal-sawmdawngzela'n a dan sak. Point mamawh zawk Chanmari West tan H. Lallianzama a inlan a, BVT defender an ṭan khawng ve tlat avangin danglamna a thlen thei bik lo.

Lunglei tlangval Lalhlima'n minute 74-ah mawi zawkin freekick a pet lut a, he goal ropui hi BVT point thum hlawhchhuahna a ni. BS-a Colney hoten point ruk an hmu a, league hmahruaitu an ni.

BS-a thukhawchang

BVT coach BS-a Colney chuan, "Guwahati-a ka inkhelh hun laiin league-ah hian tawnhriat ka lo nei tawh a, chuvangin chak hun tur leh draw tuma khelh hun duan lawk a ṭul zia ka hria. Zanin hi chak tura kan ruahman lawk dan a ni a, kan beisei anga point thum kan hlawhchhuah avangin kan lawm hle a ni," tiin inkhelh banah a sawi.

MPL-a tawnhriat la nei lo BS-a'n veng leh veng inelnaa a chak duhna bakah a inkhelh hunlaia a tawnhriat Mizorama inelna sang berah a rawn keng lut a, I Day Football leh MFA Super Cup-a cheṭha lo BVT-in MPL an khelh hnuah an season ṭha ber an hmang mek.

Team Dinhmun

Team Pld W D L GF GA GD Pts

1 Bethlehem VT 2 2 0 0 3 1 2 6

2 Chhinga Veng 2 1 1 0 2 0 2 4

3 Ramhlun North 1 1 0 0 1 0 1 3

4 Chanmari FC 1 0 1 0 1 1 0 1

5 Dinthar FC 2 0 1 1 1 2 -1 1

6 Zo United 2 0 1 1 0 1 -1 1

7 Aizawl FC 0 0 0 0 0 0 0 0

8 Chanmari West 2 0 0 2 1 4 -3 0