Defender tura lakluh DAVID LUIZ

Pathianni zan dar 8:30 hian Liberty Stadium-ah Swansea hmachhawn turin Chelsea an lenglut dawn a, Blues hi coach thar Antonio Conte kaihhruaina hnuaiah an la chak vek.

Chelsea hian an defender hlui David Luiz chu Paris St-Germain aṭangin pound maktaduai 34 bawr velin transfer tawp niah an lalut a, Brazilian player hi midfield-ah pawh chhawr theih a nih avangin a khelhna tur pawh an inrinsiak nasa hle.

Italian coach Conte chuan, "Centre back kan mamawh vangin David Luiz kan lalut. Gary Cahill leh John Terry te kan nei sa a, Branislav Ivanovic hi defence laiah pawh chhawr theih ni mah se centre back ni tura kan duh avangin Luis hi kan lalut. Midfielder angin a khel thei tih pawh kan hria a, hei erawh ka rilrua awm dan a ni lo," tiin player thar chungchang a sawi.

Brazilian defender chungchang sawi chhunzawmin Conte chuan, "Player tu pawh hian football an chawlhsan hma chu hma an sawn thei. Luiz hi kum 29 chauh a ni a, a upat dan pawh a tawk. Khawvela defender ṭha ber ni turin theihna a nei a ni," tiin beiseina a nei sang hle.