DSK-in Neroca an ngam lo

Manipur club ṭha Neroca FC chuan nimin khan Durand Cup semifinal lehlamah DSK Shivajians chu 3-0 in an hneh a, an club chan-chin-a a vawi khat nan Durand Cup final an lut.

Ambedkar Stadium, New Delhi-a inkhelah Neroca-in first half-ah penalty an hmu a, Manipuri club hmahruaina goal ni turin India tan pawha lo inlan tawh Sushil Kumar Singh chuan penalty hi a chhuih lut.

English coach Dave Rogers enkawlna hnuaia khel DSK-in an si phurh sut ngei tumin theihtawp chhuah mah se second half-ah pawh Neroca bawk an chungnung. I League second division club tan Kshetrimayum Malemgamba leh Chingakham Anandkumar ten goal khat ve ve khung lehin Pune club lakah a chungnung zawkah an ṭang ta a ni.

DSK tan Mizo rawlthar pathum - MPL1 Under 17 Best Midfielder Vanlalremkima (Tetea), Electric Veng; MPL4 Best Midfielder Bethlehem Vengthlang rawlthar K.Lalṭhathanga (Puitea) leh Ramhlun South rawlthar Lalawmpuia ten inkhel bul an ṭan a, Zohmingliana Ralte, Sairuatkima leh Lalnunsiama-te chuan bench lamah hun an hmang thung.

MPL3 Under 17-a Best Forward Lalawmpuia hian inelna ṭantir lamah lehkha pawimawh chinfel lawk theih loh avangin Pune club tan a inlan lawk thei lo a, DSK tan vawi khat inlannaah hnehna a chanpui zo lo.