US Open aṭangin Serena a tla

World number 1 Serena Williams chu US Open 2016 aṭangin Karolina Pliskova hneh loin a tla! Karleha WTA ranking chhuak tharah chuan Serena hian Angelique Kerber lakah a dinhmun a hloh dawn tihna a ni. Inrinni zan dar 1:30 hian Kerber leh Pliskova ten final an khel zui ang.

Nimin zing khan Arthur Ashe Stadium-ah hmeichhe singles semifinal match hnih khelh a ni a, Serena hi seeded 10-na Pliskova lakah darkar khat leh minute 26 chhungin 6-2, 7-6 (7-5) in a chak lo. Inkhel hmasa zawkah seeded pahnihna Kerber chuan world number 1 hlui Carolina Wozniacki chu 6-4, 6-3 a hnehin a vawi khat nan US Open final a lut ve bawk.

Kum 34-a upa Serena hi world ranking-ah chawlhkar 186 zet chu a zawnin number 1 a ni tawh a, tun ṭumah hian final lut pawh nise Kerber-i'n final lut pawh nise a dinhmun luah chhunzawm tur hian a champion a ngai - final pawh a luh zawh tak loh avangin hun rei tak a lo awm tawhna hmun aṭanga paihthlakin a awm ta!

American star hi Grand Slam inelnaah bik hian vawi 22 a champion tawh a, German hranghlui Steffi Graf nen an record hi a inzat chiah a, record thar siam tur chuan season thar a nghah a ngai dawn ta rih a ni.

Serena chuan, "100%-in ka dam lo a, ka khel ṭha tawk lo bawk. Inkhel kan thlir kha chuan Pliskova kha final lut zawk tur a ni tih chu a hriat theih bawk," tiin a khup vei lamah harsatna a neih thu a sawi.

Number 1 thar tur Kerber chuan, "Ka tan chuan ni hlimawm leh chhinchiah tlak a ni, a vawi khat nana US Open final ka khel tur hi ka lawm. Number 1 thar ka ni dawn tih ka hriat khan ka hlim zual a, hei hi player zawng zawngte nih chak leh kan duhthusam ṭhin chu a ni," a ti.

German nula Kerber hian season a hmang ṭha hle a, Australian Open final-ah Serena hi a lo hneh tawh bakah Rio Olympic-ah khan silver medal a dawng bawk.