Real-in Atletico an nih rual

Karim Benzema chuan a harhtharna chan a chhunzawm zel a, Pathianni zan La Liga inkhelah Real Madrid tan goal khat khungin a chakpui. 

Real hian an mikhualna ramah Eibar chu 3-1 in an hneh a, Benzema bakah Luka Modric leh Lucas Vazquez-te chuan goal khat ve ve an khung bawk a, Eibar tana Kike Garcia goal khungin awmzia a nei lo. 

Zinedine Zidane-a nauten hnehna an chan leh tak avangin La Liga table chung bera awm mek Atletico Madrid nen an point hmuh zat a inang a, match hnihin an khel tam thung. 

Real an insiamṭhat laia insiamṭha ve hleithei lo Barcelona chu zanin dar 2:30 hian Real Valladolid khelmualah an lenglut dawn a, an chak zo lo leh a nih chuan an dinhmun a ngaihtuahawm khawp ang.

Eibar khelmualah goal khung turin Real Madrid-in hun an mamawh rei lo. Tun hnaia form tak Benzema chuan minute rukna lekah goal hmahruai a khung a, Rodrygo siamsak aṭanga a goal khung hi tawih tak a ni. 

Mualneitu Eibar an insiamrem hman lo - minute sarih hnu lawkah Real-in an goal hnihna an khung zui a, goal hmahruai khungtu Benzema siamsak chu Modric-a'n goal-ah a chantir. Eibar an awm mai mai bik lo. Awlsam takin Real an chak mai dawn nia a lan laiin tha an thlah duh lo a, minute 28-naah captain Eric Garcia chuan si phurh sutna goal a khung. Kum 31 mi Kike goal khung hi penalty box pawn aṭanga a shot a ni a, goal mawi danglam bik a ni - Eibar-in beiseina an la nei. 

Second half-ah Eibar-in beidawng duh bik loin Real an nawr a, Spanish champion ṭantute tan thin thia inkhel en a harsa ang tih a lang.  Mahse, minute 90 pelh tawh, hun pek belhah Real winger Lucas Vázquez chuan chak an tum tih nem nghetin an goal thumna a khung a, Eibar tan chhanletna hun a awm tawh lo. Sergio Ramos chuan hun tawp hnaih lama Yoshinoro Muto ball tauh chu a kiuin penalty area-ah a tawk fuh a, referee-in penalty a chawitir lo chu a vannei takzet.

Eibar hian 33% lek ball an chang chungin vawi 10 shot an nei thei a, Real-in vawi 11 shot an nei thung. A tawpah Real an chak a, champion an la beisei ve reng tih an pholang - inelna hrang hrangah match nga chhung chu a zawnin hnehna an chang ta. Real coach Zinedine Zidane chuan, "Kan khel ṭha takzet a, Eibar pawh an khel ṭha hle. He hmuna inkhelh hi a harsa tih kan hria a, mahse hamrik rik ruala a tawp thlengin inkhel kan thunun," a ti.

Real tan Karim Benzema-a'n goal a khung satliah lo a, gol lut dang pahnih hi a assist an ni bawk. French striker hian sawiselna karah rintlak a ni tih a pholan chhunzawm zel. 

Kum 33 mi striker hian La Liga match 12 aṭangin goal sarih a khung ta a, assist vawi nga a nei bawk - Champions League-a match nga a khelh aṭangin goal li a khung tawh bawk. Real boss Zidane chuan, "Karim chungchang sawi hian a ngai bawk sawi a ngai leh ṭhin. A goal khung chauh a ni lo a, kan game kaihruaitu a ni - kan tan player pawimawh a ni. "Mahse, player zawng zawng thawhrimna sawilan a ṭul a, team pahnihin kan khel ṭhain a hmuhnawm takzet a, a phu zawkin hnehna kan chang a ni," tiin a sawi. 

Atletico Madrid-in table chung ber an luah mek a, Real Madrid an insiamṭha chho mek bawk - Barca erawh an chak a kaltluang hleithei lo a, league match hnih a zawna an chak avanga an lawm viau hnuin Valencia chu 2-2 in an inhnehtawkpui leh tawh. 

Barcelona hi zanin dar 2:30-ah an inlan dawn a, Valladolid an mikhual ang - Catalan club hi table-ah pangana an ni mek a, hmahruaitu Atletico Madrid chu match khata khel tam zawk chungin point riatin an phak lo mek.

Ronald Koeman-a naute hian zaninah hnehna an chang zo lo leh a nih chuan champion beiseina a tlem lehzual dawn tihna a ni a, fan-ten point thum aia tlema lungawi an tum lo ang. Barca tan Ousmane Dembele chuan training zawm leh tawh mah se a la inlan theih a rinawm chiah lo a, Valladolid hian inhliam an neih sa Joaquin Fernandez, Saidy Janko, Javi Moyano leh  Kiko Olivas an chhawr thei lo bawk ang.