Lille-in PSG an chelh

French Ligue 1 champion Paris St-Germain tan duh hun huna chak ngawt theih a ni bik lo. Pathianni zan khan champion lai hi tun dinhmuna hmahruai mektu Lille nen goal awm loin an inhnehtawk.

Thomas Tuchel-a nauten inkhel thununin ball an chang hnem hle, mahse hliam vanga khel thei lo Neymar awm loh a lang - goal hmaah an hriam tawk lo. Kum 22 tlin cham lawmtu Kylian Mbappe chu bench lamah dah a ni bawk.

France international hi minute 77-naah dah luh a ni a, hun ṭha nei mah se a chhawr ṭangkai thei bik lo. 2018 May thla hnu lama a vawi khat nan Paris club hian league match a an khingpui te goal awm loin an inhnehtawkpui.

Match 16 aṭanga point 33 hmutu Lille hian table-ah hma an hruai chhunzawm. PSG erawh inkhel dangah an elpui Lyon-in hnehna an chan avangin pathumnaah an tlahniam, season dang aiin league nomawi humhim a harsa dawn niin a lang.

PSG hian Nilaini zanah Strasbourg an mikhual zui dawn a, inkhel dangah Lille chuan Montpellier an zin chilh thung ang - a hnu lamah chuan thlasik chawlh an nei dawn a ni.