Serie A goal rang ber a lut A chung berah Milan awm zel

AC Milan forward Rafael Leao-a'n Sassuolo lakah second rukna lekah goal a khung a, Italian football inelna sanga goal lut rang ber record a siam. Stefano Pioli naute hian 2-1 a hnehna changin point 31 an hmu a, hma an hruai chhunzawm.

Champion tum Inter Milan pawhin an mikhual Spezia 2-1 in an hneh ve bawk. Milan club pahnih inthlauhna hi point khat chauh a ni a, an hnuaiah hian champion lai Juventus chu point 27 neiin an awm ve bawk a ni.

Pathianni zan inkhelah Milan lamin goal khung turin hun an mamawh rei lo hle. Hamrik hmasa a rik rualin Hakan Calhanoglu-a'n Sassuolo goal lamah a tlanpui nghal a, a sira awm Portuguese forward Leao pein ani hian goal a khung nghal.

Kum 2001 December thla khan Paolo Poggi chuan Fiorentina lakah second 8.9 lekah goal khung record a lo siam tawh a, record khum harsa tak ni tura lang hi Leao chuan rawn khumin Serie A goal reng ber thuntu dinhmun a luah.

Mikhual Milan hian chawlhlawk hmain Alexis Saelemaekers hmangin an goal hnihna an khung a, mualneitu lamin hun tawp dawnah Domenico Berardi hmangin sut ve leh mah se awmzia a nei phak tawh lo.

Milan coach Pioli chuan, "Inkhel bul ṭantu zawka kan ṭang a nih chuan khingpuite beih dan tur kawng hrang hrang kan nei, chung zinga pakhat chu tun ṭumah khan kan hmang. Goal luh theih nana Calhanoglu, Brahim Diaz leh Leao te intlanthelh kual vel kha a hmuhnawm," a ti.

Champions League aṭanga an tlak hnuah Inter Milan an harh thar a, an hmabak a ding apiang an hneh zel. Achraf Hakimi-a'n goal hmahruai a khung hnuah Romelu Lukaku chuan penalty aṭangin an goal hnihna a khung.

Antonio Conte-a'n hliam vangin a player ṭhenkhat Alexis Sanchez, Radja Nainggolan, Andrea Pinamonti leh Matias Vecino te a chhawr thei lo a, an ṭhat dan berin khel lo mah se an mamawh point thum an hmuh theih avangin champion an beisei ngam zel.

Inter manager Conte chuan, "A zawnin Serie A match rukah hnehna kan chang ta, hetianga ṭha taka khelh tluan theih hi ka duhthusam a ni ṭhin reng a ni. Point thum kan hmuh zel miau chuan table chung lamah kan awm zel ang," a ti.

Kumin chhunga an match hnuhnung ber atan Inter hian Nilaini zanah Hellas Verona an lenchilh dawn. Hmahruaitu Milan pawhin Lazio an mikhual ang, krismas chawlh laia table hmahruaitu tur zawk a la chiang lo.