Hei le NT Lalbiakima a lo kal e!

Maggi chhum hmin tura hun i mamawh zat chu minute hnih a ni a, NT Lalbiakkima'n a professional fight hmasa bera a khingpui hneh tura hun a mamawh zat erawh minute khat leh second 25 a ni. 

NT-a te inhnek a chhuah dawn khan, a en tui nan, i ei tur maggi chhum ta la - i chhum hmin hmain Siaha tlangval hi a inhnek hman zo der dawn tihna a ni a, a hmuhnawm hman ngang lo!

Mizo tlangval NT Lalbiakkima chuan Pathianni zan khan professional huang chhunga a fight hmasa ber chu a hmachhawn a, Siaha boxer hian round khatna lekah Haryana boxer ṭha Aman chu technical knockout hmangin a hneh. 

NT-a nu, Zothanpuii Khawlhring chuan inhneka zawhah hian, "Ka fapa, keini nufa hi enge maw kan nih a, Pathian hian min hriat reng ṭhin le?" tiin a fapa a lawmpuina thu a au chhuahpui a, an hlimna leh lawmna chu thua sawifiah chi a ni lo. 

Navy boxer ni ṭhin, beisei anga amateur boxing-a duhsak hlawh tawk lo NT-a hian professional huang luhchilh a châkna a rei tawh a, mahse, a pa N. Zomawia'n a phal lawk lo. 

June 6, 2019 khan NT-a hian a pa a chan a, NT-a pain a fapa a kalsan dawna a chah chu, "Professional boxing chu lo luhchilh ngei ang che," tih a ni a, December 20, 2020 zanah a fapa chuan a pa lawmna siam turin professional boxing ring a luhchilh ta - chhuang takin a lo thlir ve ngei ang. 

NT-a chuan, "Ka pa tan a ni, ka pa tan a ni e. Min kalsan dawna a thu min chah chu professional boxing luhchilh a ni a, ka pa beiseina ka ti hlawhtling thei hi ka lawm takzet a ni," tiin Vanglaini a hrilh. 

Siaha tlangval hian inhnek ṭantirh aṭangin a thiam dan berin Aman hi a attack nghal a, Haryana boxer-in inven mai loh chu tih theih a nei lo - a ban a  hliam zui a, technical knockout hmangin NT-a chu chak zawkah puan a ni. 

NT-a hian professional boxing luhchilh tura thutlukna a siam khan VN Promotions a zawm zet a, South Korea-ah IBO world minimumweight title fight hial lo nei tawh Michael Landero enkawlna hnuaiah a training. 

Siaha boxer hian professional fight hmachhawn ngei tumin training a nei chho a, WBC Asia title thlengin beisei ṭhin mah se Covid-19 vangin fight a nei lawk thei lo. India-ah NT-a a lo haw a, tunah chuan a duh ang ngeiin fight a hmachhawn ta. 

NT-a chuan, "Nikum aṭangin ka nghak tawh a, ka training reng a, engtikah nge fight ka neih theih ang, tih ringawt ngaihtuahin hun ka hmang a, tunah chuan ka duh ang takin a thleng thei ta. "Mahse, khati khawpa nasa khan ka inbuatsaih a, ka duh aiin a tlawm hma - inhnek kha ka kham lo!" tiin Vanglaini a hrilh a, minute hnih em pawh a tlin hmaa a chak chu a rei lo a ti mah mah!

NT-a tan kalkawng a awlsam lo. Professional boxing luhchilh turin kalsan tam tak a nei a, a hna ṭha tak a kalsan a, chhungkaw tan chuan uiawm tham tak a ni. 

Siaha boxer chuan, "Ka nu chungah ka lawm takzet a, kawng tinrenga min thlawp tlatna avanga tun dinhmun hi thleng thei ka ni. Ka nu, ka lawm e," tiin a nu chungah lawmthu a sawi. LPS Pro Fight lightflyweight-a a zawna vawi nga champion thei boxer chuan sawi zawmin, "Sports minister Robert Romawia Royte chungah pawh lawmthu ka sawi a, ani hian kawng tinrengah min thlawp a ni. Dr. Muanpuia (MF&AS)-in keima puala gym siamin min buaipui a, a chungah pawh ka lawm takzet. 

"Pathian min hruaina hi a mak a, lawmthu sawi mai loh chu tih tur a awm lo. Mizo mipuite min ṭawngkaipuina zawng zawng pawh ka hre reng a, an chungah lawmthu ka sawi a ni," tiin Vanglaini kaltlangin lawmthu a sawi. 

NT-a inlanna hi Warrior Boxing Series tih a ni a, Marine Pro Boxing Promotions huaihawt niin ruahman dan chuan March emaw April-ah neih leh tura tih a ni - Siaha boxer hi hetah hian a inlan leh ang. 

Marine Pro Boxing Promotions neitu Devraj Das chuan, "WBC Asia title hi kan hmachhawp lian ber chu a ni a, mahse, hemi hma hian fight pahnih tal a neih leh kan duh. 

"Warrior Boxing Series neih leh huna a inhnekna tur buaipui mek a ni a, international boxer thlengin kan dawr a, Covid-19 vangin duh angin thil a awlsam thei lo zawk a ni," tiin Vanglaini a hrilh. Dev chuan, "NT-a boruak lenzia ka hria a, a fight a hmuhnawm a, India-in boxer kan neih ṭhat ber pawl a ni a, a inhnek hmuh chhunzawm zel hi ka duh a ni," tiin NT-a tan fight an chhawpchhuah zel tur thu Vanglaini a hrilh bawk.