Aizawlah WBC Asia title?

NT Biakkima hmachhawp lian ber chu WBC Asia title fight a ni a, Marine Pro Boxing Promotions neitu Devraj Das chuan nakkum November hmaa he fight hi thlentir ngei an tum thu a sawi. Devraj chuan, "Inbiakna a kal mek a, theihtawp chhuahin he fight hi thlentir ngei kan tum. Ka rilruah Mizoram a awm a, Aizawl khawpuiin a vawi khat nan WBC title fight thleng se a pui dawnin ka hria. "Nakkum January-ah Mizorama rawn zin ka tum a, sorkar nen kan inbia ang. November hma ngeiin Aizawl khawpuiah, fans tam tak nen he fight hi thlentir ka duh a ni," tiin Vanglaini a hrilh.