East Bengal leh Blasters an inhnehtawk

Tun season Indian Super League-a chak la nei lo Kerala Blasters leh East Bengal chu Pathianni zan khan an intawng a, 1-1 a inhnehtawkin chak zawk an awm lo. 

Blasters defender Bakary Kone chuan minute 13-na lekah an lamah a ti lut a, Lyon defender hlui hian East Bengal midfielder Mohammed Rafique-a ball cross lo dan a tumna lamah an lamah a ti lut.

Kone hi minute 82-naah lakchhuah a ni zui a, Mizo midfielder K. Lalṭhathanga (Puitea) chuan a thlak. 

East Bengal hian tun season-a an chakna hmasa ber ni turin he goal hi an chakpui mai dawn niin a lang hman a, mahse Jeakson Singh chuan Blasters tan hun pek belhah si phurh a rawn sut - draw result-ah team pahnih an lungawi a ṭul.

Pathianni zan ISL inkhel hmasa zawkah Mumbai City chuan 2-0 in Hyderabad FC an hneh bawk a, Mumbai club tan hian Vignesh Dakshinamurthy leh Adam le Fondre-te chuan goal khat ve ve an khung a ni. Hyderabad tan Lalawmpuia chu minute 71-naah luhtir a ni a, mahse Mizo forward hian danglamna a thlen thei lo. 

Inkhel Results

Hyderabad FC    0 - 2    Mumbai City FC

MFC: Vignesh Dakshinamurthy 38'; Adam le Fondre 59'

East Bengal    1 - 1    Kerala Blasters

EBL: Bakary Kone 13' (OG)

KEB: Jeakson Singh 90+5'

Zanin Inkhel Tur

Odisha FC    7:30 PM    NorthEast United FC