Sports Personality of the Year atan Hamilton

British media lian BBC chuan kum tina a tih ṭhin danin infiammite chawimawina hun a hmang a, award ngaihhlut BBC Sports Personality of the Year 2020 chu Lewis Hamilton kuta hlan a ni.

Award dawng tur hi mipui thlan a ni. Formula 1 driver ropui dawtah hian Liverpool captain Jordan Henderson a awm. Henderson-a'n mimal chawimawina dawng ta chiah lo mah se a team chu Team of the Year award a lakpui ta tho.

UFC fighter Khabib Nurmagomedov chu World Sport Star of the Year atan thlan a ni. Russian tlangval hian a fight hnuhnung ber atan October thla khan Justin Gaethje a hneh. UFC huang chhungah fight vawi 29 a hmachhawnah hneh loh tawng loin a chawl.

Manchester United forward Marcus Rashford hnenah Expert Panel Special Award an pe. Hrileng vanga harsatna a thlen laiin Rashford hian naupang rethei leh ei tur nei lo tan nasa takin hna a thawk a, naupang maktaduai 1.3 zetin zirna inah chawchhun an ei theih nan hma a laksak.

London hmar lama awm Stevenage khaw chhuak Hamilton-a'n a vawi sarih nan F1 nomawi a chawi. Mercedes driver hian car intlansiakna sang bera chak hnem ber Michael Schumacher (7titles) a nih rual.

Nomawi a chawi a ni satliah lo, Grand Prix a hnehna chan tam lamah pawh German legend hi khumin chak tam ber a ni - Hamilton hian vawi 91 zet hnehna a chang tawh, season tharah a chhunzawm ngei pawh a rinawm.

Kum 35 mi Hamilton chuan, "Chawimawina dawng thei turin mi ropui tak tak chhawpchhuah an ni a, an zinga ka tel ve ringawt pawh kha lawmna tur a tling tawh. Chutiang bakah vote hlu tak min pe tute chungah lawmthu ka sawi takzet.

"Hun harsa kan hmachhawn tlang vek a, a bik takin hri dona kawnga hna thawk tute hnathawh a ropui ka ti. Hri leng karah pawh mitinte Krismas hlimawm tak hmang ṭheuh turin duhsakna ka hlan a che u," tiin a sawi.

Covid-19 vanga buaina karah Liverpool chuan hnehsawh takin Premier League nomawi an chawi. Reds hian phu takin Team of the Year chawimawina an dawng a, kum 30 chhung an nghah tawh nomawi lakpuitu Klopp tan Coach of the Year dawn a inhmeh bawk.

Klopp chuan, "Kan team hian he chawimawina hi an phu ka ti. Season duhawm leh hriatreng tawh tur chu an hmang zo chiah a ni. Theihna nei sang tak tak an awm a, an theihna a sang a ni satliah mai lo - tihtakzetna nen inelna an hmachhawn ṭhin.

"Kan hlawhtlinna kha thawhhona ṭha tak kan neih vanga chang kan ni a, tuna kan award dawn pawh hi kan zavaia tan a ni. Coach award ka dawng hi ka lawm bawk, hetiang dinhmun kan thlen theih chhan chu Liverpool vang a ni, engkimah ka lawm," a ti.

German coach kaihrhuaina hnuaiah Liverpool hian record thar an siam, league match khelh hmabak pasarih nei chungin an champion fel der tawh. Inelna hrang hrangah an muala match 24 an chak chu mahni khelmuala chak hnem record a ni bawk.

Sports Personality of the Year:    Lewis Hamilton

Helen Rollason Award:    Captain Sir Tom Moore

Expert Special Panel Award:    Marcus Rashford

Coach of the Year:    Jurgen Klopp

Team of the Year:    Liverpool FC

Unsung Hero:    Sgt Matt Ratana

Young Unsung Hero:    Tobias Weller

Young Sports Personality:    Andrea Spendolini-Sirieix

World Sport Star of the Year:    Khabib Nurmagomedov