Mizoram cricket-in hma kan sawn zel - Mamon

Indian Premier League chu UAE-ah khelh mek a ni a, Cricket Association of Mizoram secretary Mamon Majumdar pawh a hmunah hian a zin.

IPL Governing Council member Mamon chuan, "Pathianni khan Dubai-a ICC Academy kan tlawh a, a changtlung hle. Thil tam tak ka hriat phah. Mizoramah pawh academy din tum a ni a, tuna ka thil hmuh hian nasa takin min pui ang," tiin Vanglaini a hrilh.

Mizoram chungchang sawi zuiin Mamon chuan, "Tun hma kha chuan Mizoram tan BCCI hnuaia member nih hi kan beisei phak lo a, tunah erawh member kan nih bakah kan lut thuk zel. "UAE-a kan zinnaah pawh hian BCCI president Sourav Ganguly, secretary Jay Shah leh treasurer Arun Dhumal te nen kan inkawp chawt a, Mizoram cricket hmasawn zel nan a pawimawh a ni," tiin BCCI hruaitu liante nena an inkar a ṭhat hu a sawi.

Covid-19 vangin kumin Indian Premier League hi UAE-ah khelh a ni a, ruahmanna a fel fai hle. Mamon chuan, "Stadium-ah inkhel entu an awm lo a ni mai a, a bak zawng chu duhthusam ang thlap a ni. Stadium a ropui em em a, inenkawlna pawh a ṭha. Covid-19 lakah an fimkhur a, ni khat kar danah Covid-19 test kan nei reng a, kei pawhin vawi li test ka nei tawh," tiin Vanglaini a hrilh.