Davis hmangin Lakers chungnung

Hun tawp hamrik a rik rualin Anthony Davis chuan 3-points a vawm lut a, a team Los Angeles Lakers chu Denver Nuggets lakah 105-103 in hnehna a chan pui.

Western Conference finals game 2-ah an chak leh tak avangin series-ah Lakers hian 2-0 in hma an hruai fal. September 23, Nilaini hian game 3 an khel chhunzawm dawn a, dinhmun hniam zawk Nuggets tan beisei nei turin chak a pawimawh.

Lakers hian season 10 hnua a vawi khat nan conference finals an khel, finals an luh hnuhnunga an thiampuipa Kobe Bryant hriatreng nan nimin zinga an match-ah hian 'Black Mamba' chuanna jersey an ha. January thla a thi ta Bryant puala champion an duh khawp ang.

Point 31 neitu Davis chuan, "Ka tan chuan hun hlu bik a ni a, keimah chauh ni loin team tan pawha hun chhinchhiah tlak a ni bawk. Game hmasa pahnih kan lak avangin kan dinhmun a ṭha, chutih rualin kawng zawh tur erawh a la thui," tiin a sawi.

Lakers tan hian Davis bakah LeBron James a thawh hlawk. Most Valuable Player thlanna a pahnihna James hian point 26 a neih bakah rebound vawi 11 a la bawk - James leh Davis te an inkawp rem em avangin Lakers hian beisei an nei sang hle.

Eastern Conference finals lamah chuan Miami Heat chuan Boston Celtics lakah 2-1 in series hma an hruai mek. September 24, Ningani zingah game 4 an khel chhunzawm ve thung dawn a ni.