Gomez a chawl rei dawn

Liverpool manager Arne Slot chuan a defender Joe Gomez dinhmun a chian loh thu a sawi a, English centre back hi a malpui hliam chu zai a ngai mai thei.

Slot chuan, "Club chuan Gomez hi zai a ngaih dawn leh dawn loh a ngaihtuah mek a, zai ngai ta lo pawh ni se, rei tak chu a chawlh a ngai dawn tho a ni," tiin a defender chungchang a sawi.

Kum 27 mi defender hi hliam vangin a buai fo a, tun season-ah pawh inelna hrang hrangah match 17 chiah a la khel - heng zinga match 10-ah chiah hian bul a ṭan.

FA Cup fourth round-a Plymouth Argyle an hmachhawn ṭumin minute 11-na lekah malpui hliam vangin lakchhuah a ngai a, Championship club laka a inlan hma khan malpui hliam vang thoin kar ruk ngawt a chawl tawh - a lo kir a, a inhliam lehnghal.

Slot chuan, "Joe tan mai a ni lo a, keini tan pawh chanchin lawmawm lo tak a ni. Khelmuala a lo kir leh theih nan a thawkrim em em a, heti hi a ni leh si. Hun engemaw chen chu a inlan thei dawn lo a, season tawp erawh min kharpui theih kan beisei," a ti.

Liverpool hian zanin dar 1:00-ah league match khel turin Aston Villa an lenchilh dawn a, Pathianni zanah Manchester City an lenchilh zui dawn avangin Slot-a tan player rem thiam a ṭul khawp ang.

Reds hian EPL table chung ber an luah mek a, an hnuai chiaha awm Arsenal aia an sanna hi point sarih chauh a nih avangin vawi khat chetsual a pawi thui thei.

Hetihlai hian tlarhma lama player 'form' em em mai Cody Gakpo pawh hliam vangin a chawl mek a, zaninah a la inlan thei dawn lo.