Last 16-ah Alcaraz a lut

Qatar Open khelh laiah Carlos Alcaraz chuan last 16 a inhlangkai - Spanish star hian a thiam zual zinga tel tur hian tawnhriat ngah Marin Cilic chu 6-4, 6-4 in a hneh a ni.

Kum 36 mi Cilic hi a vanglai chuan khawvela a ṭha berte zinga mi a ni, kum 2014 khan US Open nomawi pawh a lo chawi tawh, mahse tunah chuan a tlahniam tawh, world number 192 a ni phak chauh.

Croatian player Cilic hian a tirah chuan 4-3 in hma a hruai a, mahse set a la tlang zo lo. Set hnihna tir lamah pawh Alcaraz-a service chhuhsak theihna remchang te a hmu a, amaherawhchu a tihlawhtling thei leh ta chuang lo.

Spanish star Alcaraz chuan, "Tawnhriat ngah tawh tak mai hmachhawn hi chu a harsa ṭhin, kan ṭhat tawk lohna lai hi an hmu thiam vat a, chumi laiah tak chuan min lo bei ṭhin, tun ṭumah pawh khan a lang chiang hle.

"Harsa tak chunga hnehna ka chang thei hi ka lawm, ka tan chuan zirlai zir belh tur hi a la tam em em a ni," tiin a sawi a, player ṭha tak ni ṭhin Cilic laka a khelh danah a lungawi hle.

Grand Slam vawi li champion tawh Alcaraz hian a match lehpekah chuan Zhang Zhizhen leh Luca Nardi te inkhela chak zawk a hmachhawn leh dawn a, tun inelna neih laiah hian champion tura rinkai leh buk rit a ni.

Inkhel dangah Grigor Dimitrov erawh a chak lo - seeded pasarihna lai ni phak mah se Dimitrov hi Jiri Lehecka lakah 6-4, 6-4 a tlawmin a zinkawng a tawp hma hle.

Seeded pariatna Jack Draper erawh a chak - Britain tlangval hian Alexei Popyrin 6-2, 7-6 (4) in a hneh, a match lehpekah chuan Australian player tho Christopher O’Connell a hmachhawn leh dawn a ni.

Qatar Open-ah hian player langsar dang - Novak Djokovic, Alex de Minaur, Daniil Medvedev, Andrey Rublev leh Stefano Tsitsipas te pawh an inlan dawn a ni.