Inthlahdah a thiang lo - Enrique

Paris Saint-Germain chuan zanin dar 1:30 hian Champions League playoff khel turin Brest an lo mikhual dawn, khualmualah 3-0 ngawta hnehna an lo chan tawh avangin tlang turin an dinhmun a ṭha.

Mahse, Paris coach Luis Enrique erawh a ṭawng fimkhur hle thung. Enrique chuan, "Champions League a nih tawh chuan eng match pawh ni se namnul theih a ni lo, inlehthal thei vek kan ni tih hriat a ngai.

"Kan dinhmun a ṭhat thu chanchinbu lamah kan chhiar a, a dik pawh a dik ngei mai. Mahse, hamrik hnuhnung ber a rik hma chuan kan inthlahdah thiang lo," tiin a sawi.

Spanish manager hian Ligue 1 lamah a player ṭha ṭhenkhat a hahchawlhtir a, zaninah chuan sahuai a ser leh thei tawh ang. An intawn hmasaka goal hnih khungtu Ousmane Dembele chu Brest tana ven uluk bik ngai tur a ni ang.

PSG hian Ligue 1 nomawi chu an chawi leh ngei a rinawm a, club thuneitu lamin an duh ber erawh Champions League hi a nih avangin, European football inelna sangah hian thapui an thawh chhunzawm dawn a ni.