Season thar atan kan inpeih - Red Bull Principal

Formula 1 season thar a hnai a, team ṭha Red Bull CEO leh Team Principal ni bawk Christian Horner chuan inelna lian leh hautak hmachhawn thei turin an team chu an inpeih tawh tih a sawi chhuak.

Red Bull hian Max Verstappen an nei a, Dutch driver hi a zawna vawi li champion thei a ni - season tharah pawh hian driver dangte tana elpui hautak ber a nih leh ngei pawh a rinawm.

Team championship lamah pawh Red Bull an chungnung ṭhin, mahse season hmasa chawhnu lamah khan McLaren leh Ferrari ten an el phak a, tun season tingaihnawmtu an ni tura ngaih a ni.

Red Bull Formula 1 chief Christian Horner chuan, "Kum 2023 kha kan thlirkir a nih chuan intlansiak 23 zinga 22 tehmeuhah hnehna kan chang a, midang tana khawih buai phak lohin kan awm hial.

"Mahse, season hmasa kha kan thlirkir a nih erawh chuan midang chunga leng kan ni bik tawh lo tih hriat a ngai. Chuvangin tun season lo awm tur atan pawh inbuatsaihna kan nei ngawrh takzet a, tunah chuan kan inpeih tawh," a ti.

Season hmasa khan an driver duhlai Max Verstappen leh Red Bull inkarah thawm ṭha lo ri a awm, amaherawhchu an hmet mit thei niin a lang a, team thuneitu Horner chuan boruak ṭha tak hnuaiah inelna an hmachhawn dawn niin a sawi bawk.

Khawvela car intlansiakna sang ber Formula 1 season thar an ṭan hnai tawh - March thla laihawl hian a hmasa ber atan Australian Grand Prix an tlan dawn a ni.