World no. 1 Kerber kutah US Open nomawi

Angelique Kerber chuan Karolina Pliskova hnehin US Open 2016 champion nomawi a chawi. Vawiina WTA in hmeichhe ranking a tihchhuah thar turah German nula Kerber hian Serena Williams lehpelin world number 1 thar a ni ang.

Inrinni zan khan Arthur Ashe Stadium-ah final khelh niin seeded pahnihna Kerber hian seeded 10-na Pliskova chu darkar hnih leh minute 11 chhungin inkhel inhnehtawk takah 6-3, 4-6, 6-4 in a hneh.

Tennis legend Steffi Graf chuan kum 1996 khan world number 1 ni chungin US Open nomawi hi a lo chawi tawh a, hemi hnuah German nula zingah Kerber hi hetiang dinhmun luah leh thei hmasa ber a ni.

Phuba chu

Kum 24-a upa Pliskova hian tun season WTA tour-ah vawi 447 zet ace a siam tawh a, a zawna match 11 chhung hnehna changin US Open hma chiaha an khelh Cincinnati final-ah khan Kerber hi a lo hneh tawh nge nghe.

Amaherawhchu, inelna lian Grand Slam-ah erawh result a dangam ta. Kum 28-a upa Kerber hian set hloh miah loin final a lut a, nomawi inchuhna inkhelah hian a khingpui service hi ṭum li ngawt a chhuhsak thei. Hei mai bakah hian inkhelh chhung zawngin vawi 17 chiah unforced errors a nei a - hnehna chan phu khawpin a khel ṭha hle.

Semifinal-a Grand Slam vawi 22 champion tawh Serena Williams vaw tlatu Czech Republic nula Pliskova hi major tournament-a final a vawi khat khelhna a ni a, set hmasa berah chauh pawh vawi 17 ngawt unforced errors a nei! Set hnihna lai vein set hnuhnung berah 3-1 in hmahruaitu ni thei mah se hun pawimawhah a tawnhriat neih tlem zawkna langin a service a hum zo lo zui a, a tuar zui ta bawk.

Pliskova hian fourth round-ah Venus Williams a lo hneh tawh bawk a, hranghlui Martina Hingis, Justine Henin leh Kim Clijsters te tih lohah chuan ani chiah hi tournament pakhata Williams unau hneh thei a la ni. Chak lo zawkah ṭang mah se attacking game hmuhnawm a khel thei a, a service a ṭhat bawk avangin hmabak a nei êng hle. Tun dinhmuna thil chiang erawh hei hi a ni - Pliskova hnuhma ṭha tak hi Kerber-i ropuina ti zualtu mai a la ni rih awm e.

Hei le no 1 thar

WTA number 1 tih leh Serena hming hi a inzawm tlat ṭhin. American star hian a zawnin chawlhkar 186 tehmeuh chu he hmun hi a luah tawh a, a ta neih tawh a ni ber. Kum 34-a upa Serena hian kuminah Australian Open leh French Open nomawi a kawl lai a hloh tawh a, Wimbledon-ah champion mah se US Open-ah beisei a phak loh leh tak avangin hun rei tak a lo chenchilh tawh a chung ber dinhmun a hloh a ṭul.

Kum 1987 August - 1991 March thla chhung khan Steffi Graf chuan chawlhkar 186 zet number 1 dinhmun a lo luah tawh a, he a record ṭha tak hi Serena hian a umphak. Grand Slam nomawi chawi hnem lamah pawh Serena leh Steffi te hi an intluk mek bawk. Serena hian major title chu a la lak belh leh maithei a, a kum ngaihtuah erawh chuan zawnin number 1 a nih reng erawh a rinawm tawh hran lo thung.

Vawiin aṭangin German star Kerber hi world number 1 thar a ni a, Open Era bikah a hnam puinu record number 1 ni rei thei leh Grand Slam champion hnem ber kum 25 chung zet lo ding tawh a humhim sak bawk. Kerber hi Steffi Graf-i tan a hluin a ṭanawm hle ang tih a chiang a, an ram tan chuan fanu hrin manhla tak a ni chiang ang.

Kerber-i kum

Kumin WTA season ṭan dawn khan Kerber hi world number 10 a ni. Grand Slam tournament hmasa berah khan final-ah beisei loh takin Serena a hneh a, a vawi khat nan major tournament-ah a champion. Melbourne-ah hian a match hmasa berah Misaki Doi nen inhmachhawnin Japan nulain match point a hmuh tawh chu a pawttla leh a ni.

French Open-ah erawh beisei a phak lo, inelna lian leh ngaihhlut Wimbledon-ah final lut lehin hemi ṭum hi chuan Serena a ngam lo ve thung bawk. Rio Olympic-ah inlan chhunzawm lehin final a lut leh a, gold medal inchuhna inkhelah Monica Puig a hneh loh avangin an ram tan silver a hlawh chhuak.

Grand Slam inelna hnuhnung ber US Open a rawn her chhuak a, match sarih a khelh aṭangin set khat chiah hloin a kaltluang a. Tun dinhmunah chuan aia Kerber champion phu leh number 1 ni tur tling leh ṭha an awm chuang lo - tun season-ah match 54 zet hnehna a chang tawh a ni.

Eng nge an sawi?

Number 1 thar Kerber chuan, "Tunah hian Grand Slam nomawi pahnih chu ka kawl ve ta reng mai, ka tan a hluin a ropui a ni," tiin lawmman a dawn hnuah a sawi. Kerber hian final-a a khingpui chu hmachhawn a harsat thu leh stadium nuam leh ropui taka an inkhelh thu a sawi lang tel bawk.

Kerber chuan sawi chhunzawmin, "Ka naupan lai aṭanga ka duhthusam chu number 1 nih leh Grand Slam champion nih hi a ni a, tunah chuan a takin a lo thleng ta! Vawiin hi a hun chu a ni, ka duhthusam a thlen dik tak avangin ka hlim takzet," tiin a sawi.

Kerber hian a naupan lai chuan Steffi Graf-i inkhel lai TV aṭangin a en ṭhin a, a chet ranna leh a finna chu a lo zir ṭhin thu a sawi. US Open final an khelh hma pawh hian tunhma aṭanga tun thlenga a icon hnen aṭang hian hlawhtling tura duhsakna thu a dawng nghe nghe.

Pliskova chuan, "Inelna lian leh hau takah pawh ṭha takin ka khel thei tawh tih ka nemnghetin ka hria. Kerber kha number 1 a ni dawn tih a chian tawh avangin inkhel a harsa dawn tih kha chu ka hre lawk a, chutichung chuan ka khel chhe bik hran loin ka hria," tiin a sawi.