Hun tawp ruala laipui puakin Gunners chhanhim

Santi Cazorla-a'n hun tawp dawna penalty pet a goal hmang­­in Arsenal-in an mikhual Southampton 2-1 in an hneh a, tun season Pre­mier League match li an khelh tawh aṭanga point sarih hmuin table-ah parukna an ni. London club dang Tottenham Hotspurs-in Son Heung-min goal hnih, Dele Alli leh Harry Kane te hmangin Stoke City 4-0 in an sawp.

Inrinni zan khan Emirates Stadium-ah Gunners tan pound maktaduai 35 man centre-back Shkodran Mustafi leh forward Lucas Perez ten inkhel bul an
ṭan a, khelmual chhungah erawh Laurent Koscielny leh Cazorla te an langsar fal hle.

Midfielder Dusan Tadic freekick petin goal bar a per a, ball lo kal let chuan Petr Cech a hnung perin an goal-ah a lut a, mikhual Saints-in minute 18-naah hma an hruai. Arsenal tan kum 31-na piancham lawmtu Koscielny chuan minute 29-naah Cazorla corner pet chu buai nuaih karah mawi zetin a bin lut.

Wenger-a'n Thawhlehni zana Paris Saint-Germain nen Champions League an khelh tur thlir lawkin Olivier Giroud, Alexis Sanchez leh Granit Xhaka te bench-ah a ṭhuttir a, French manager hian a tisual teuh hle.

Point khat ve ve an hmu mai dawna a lan hnuah defender Jose Fonte-a'n Gunners striker Giroud a tihtluk vangin penalty a chawi a, Spain international Cazorla chuan goal-ah chantir zuiin Saints tan sutna hun a awm tawh lo a, khual mualah point hnih an hlohah an ngai a nih pawhin a mak lo hran lo.

Manager thukhawchang

Arsenal manager Wenger chuan, "Ka la en nawn leh lo a, mahse mi zawng zawngin penalty a nih thu min hrilh," tiin hun tawp dawna an penalty hmuh chungchang a sawi.

Wenger chuan sawi chhun­zawmin, "Penalty kan hmuh hma khan Saints khan hun an khawhrual lui hnem em em a, keini lam khan point hmuh phu khawpin kan khel zawk a ni," a ti.

Southampton manager Claude Puel chuan, "Kan match hnuhnung pali aṭangin vawi thum penalty kan chawi tawh a, ka player-te tan chuan a harsa a ni. Referee thutlukna chungchang sawi ka tum lo a, khelmual chhunga rim taka kan thawh rah a tawpa thaibo sak kan ni erawh a pawi hle," tiin a thusawi a ṭangin a lawm lo tih a hriat. Saints hian tun season-ah league match li an khelh tawh aṭangin point hnih chiah an la hmu a ni.