Man United tana malsawmna League Cup

Manchester United-in Premier League match hmasa berah Crystal Palace 3-1 in an hneh lo a, kil tin aṭangin an sawisel. Ole Gunnar Soskjaer hoten match hautak an hmachhawn leh hmain League Cup a tla zep hlauh a, zanin dar 12:45 hian Championship club Luton Town an hmachhawn dawn.

Luton Town hi kum 135 a upa ni tawh mah se Premier League la khel lo an nih avangin Mizote zingah a tla na hran lo. Season liam ta khan Championship-ah 19-na an ni pha chauh a, chutihrualin tun season match hmasa pahnihah an chak.

Nathan Jones hoten hian league-ah Barnsley leh Derby County te an hneh tawh a, League Cup third round thleng turin Norwich City leh Reading te an hneh tawh bawk. Manchester United-in season tharah chak an la neih loh laiin an khingpui tur Luton Town hi vawi li ngawt an chak tawhna a ni a, match fitness an neih tawh dawn bakah Kenilworth Road-ah khelh a nih dawn avangin Solskjaer-a hi talbuai thei an ni.

Season liam ta thlir kir chuan Ole Gunnar Solskjaer-a hote hi January thlaa Bruno Fernandes an lakluh hnuah an chak chho ngar ngar a, an hawi sang vah a tih theih. Season tawpah an tum ram pathumna ni zui mah se July 13-a Southampton nen 2-2 a an inhnehtawk aṭangin an inrintawkna an hloh ṭan. 

FA Cup-ah champion rinkai an ni pha nachungin Norwich City lakah 2-1 chauhin an chak a, semifinal-ah Chelsea hmachhawnin 3-1 in an mualpho. Europa League-ah a danglam tam lo, an muala LASK an hnehna zat chu 2-1 chauh a ni a, Copenhagen hneh tur pawhin penalty mamawhin 1-0 chauhin an chak. Semifinal-ah Sevilla 2-1 in an hneh lo a, Solskjaer-a hoten nomawi chawi loin season an khar.

Premier League-a pathumna an nih avangin United an lawm a, chutihrualin FA Cup leh Europa Leauge-a an tlak chhanah an chau tawngkhawng leh squad chhah tawk lo an mawhpuh. Transfer boruakah Jadon Sancho hming an lam ri a, an la mai dawn emaw tih hnuah a tlawlh. United boruak rawn nung chho leh ṭan chuan hniam lam a pan leh ta zawk.

Greece ramah Harry Maguire-a'n thubuai a nei a, Mason Greenwood pawh England tana an fehchhuahnaah a mualpho, Paul Pogba lah Covid-19 positive vangin training a ṭan lawk thei lo a, Aaron Wan-Bissaka pawh Dubai-ah chawlh a hman avangin quarantine niin training a zawm tlai. Player engemaw zatin an ram tan an khel bawk nen Luke Shaw chuan, "Training-naa ka neih hmasak ber ṭum chuan kut khing khata kutzung ṭang zat lek kan awm," tiin inpuahchahna an neih ṭhat loh thu a sawi.

Manchester United-in Donny Van de Beek chiah nipui transfer-ah player an lalut a, Dutch midfielder hian theihna sang tak ni mah se United-in an mamawh centre back, left back leh right winger a nih loh avangin transfer-ah Ed Woodward leh Man United an mualpho. Premier League match hmasa ber an khel a, Crystal Palace lakah 3-1 a an chak loh zui avangin Solskjaer-a hote an tlu sawp a ni ber.

United-in transfer-ah an duh ang an la lo a ni thei a, chutihrualin Crystal Palace hneh theihna tur squad an nei sa a, Luton Town phei chu an hneh nge ngei a ngai ṭul. Solskjaer-a tan keeper pakhat zawk Dean Henderson hman hun a ni thei ang a, English goalkeeper hian number 1 nih a tum miau avangin inkhel ti hmuhnawmtu pakhat a ni pha ang.

Season liam ta khan match zawng zawngah Harry Maguire a khel kim vek a, English defender hi a khelh leh a rinawm. Zanin hi Maguire a kawppui tur zawnna hun ṭha a ni dawn a, Victor Lindelof thlak nghal thei tur chu Eric Bailly a ni. Nimin lam khan khawthlang media te chuan United-in centre back lak an tum lo tih thawm a awm leh tawh a, hemi a nih avang hian Ivorian defender hi a chet ṭhat a ṭul lehzual. 

Mipui mit fukna tur chu Donny Van de Beek a ni a, Dutch midfielder hian Crystal Palace lakah goal a khung nghal. Ajax midfielder hlui chuan, "Goal khung mah ila ka chak lo. Hnehna chan hi ka ngaih pawimawh hmasak ber a ni. Training-naah kan ti ṭha em em a, amaherawhchu Palace lakah khan ball kan inpe muang a, kan rang tawk lo. Kan insiamṭha ang a, kan inkhelh leh hunah chuan kan chak tawh ngei ang," tiin a sawi.

Solskjaer-a'n Van de Beek a awltir avangin sawisel a hlawh a, League Cup-ah bul a ṭantir tawh a rinawm. Chutihrualin Carabao Cup hian ngaihhlut a hlawh tawk lo tih hriat a ṭha a, Norwegian manager-in player a siksawi deuh a nih pawhin a mak lo ang.