Goal nen Ronaldo a lo kir
Euro 2016 final-a a inhliam hnuah a vawi khat nan Cristiano Ronaldo-a'n khelmual chhung-ah a hmel a lan a, goal khung tura a hun mamawh zat chu minute ruk a ni.
Real Madrid hian Inrinni zan khan La Liga match-ah Osasuna an mikhual a, 5-2 a hnehna changin league match thum an khelh tawhah hnehna an la chang fai vek - La Liga match 15 chhung a zawna hnehna an channa a ni bawk.
Barcelona manager Luis Enri-que-a'n La Liga kaithar Alaves a zuam sual a, Lionel Messi leh Luis Suarez-te bench lama hun a hmantirna inkhelah 2-1 in an tlawm.
An match hmasa pahniha hnehna an chan zawh loh hnuah Atletico Madrid an tho ve leh ta a, Diego Simeone-a naute hian an mikhualna ramah Celta Vigo chu 4-0 in an sawp.
Madrid chak nuamsa
Santiago Bernabeu-a hneh-na chang turin Real Madrid-in harsatna an tawk tam lo. Minute 6-na lekah Ronaldo-a'n goal hmahruai a khung hnuah Danilo, Sergio Ramos, Pepe leh Luka Modric ten goal khat ṭheuh an khung ve leh a, Ramos leh Pepe tauh luh tur siamsaktu Toni Kroos chu player langsar zinga mi a ni.
Mikhual team-in goal li an chhuah hnuah Oriol Riera leh David Garcia hmangin goal hnih khung ve leh mah se an penalty hlawhchhuah chu Roberto Torres-a'n a pet luh loh bakah full-back Tano Bonnin chu minute 79-naah hnawhchhuah a ni a, an tan thawhleh ngaihna a awm tawh lo.
Portugal captain Ro-naldo-a'n season hmasa league match 36-a inlanah goal 35 a khung a, an thiampuipa lo kir leh ta hi Real tan chuan thlammuanna tham a ni. Mahse, kum 31-a upa forward hi a la damchian loh avangin minute 66-naah lakchhuah a ni.
Ronaldo faktu Zidane
Real Madrid coach Zinedine Zidane chuan rei tak hliam vanga a chawlh hnua lo kir leh Ronaldo fakin, "Goal tam zawk a khung zel ka beisei a, record dinglai hi a thaichhe reng mai a ni. Ronaldo ang player hi chu engtiklai pawhin khingpui tan an hlauhawm ṭhin a, a lo kir hnua goal a khung lehnghal thei hi a lawmawm a ni," tiin a forward chu a chhuang hle.
Barca an mualpho
Barcelona-in Nou Camp-ah Alaves an mikhual a, manager Luis Enrique-a'n La Liga kaithar club hi a zuam a nih pawhin club pahnih dinhmun thlirin a awm lohna a awm hran lo - inkhelh hma kha chuan tupawhin Catalan club hi chak turah an ngai ngei ang.
Mahse, beisei loh angin thil a thleng - Brazilian forward Dey-verson chuan inkhel ṭan
aṭanga minute 39-na lekah goal khungin Nou Camp-a ngawihtir a, Neymar-a corner hmangin defender Jeremy Mathieu-a'n Barca tan sut ve leh mah se Spanish win-ger Ibai Gomez-a'n Bar-celona tana a match hma-sa ber kheltu goal-kee-per Jasper Cillessen a bum hnuah mikhual team goal khung lehin beisei loh zawk an chak.
Enrique-a hlauthawngin second half-ah Messi, Suarez leh Andres Iniesta te luhtir mah se hnehna an chanpui zo chuang lo a, Atletico Madrid laka draw result lo hlawh chhuak tawhtu Alaves-in kum 2000 hnua a vawi khat nan Nou Camp-ah hnehna an chang.
Keimah vang a ni - Enrique
Barcelona manager Luis Enri-que chuan, "Mi zawng zawngin hnehna chang turah min ngai a, zanin hi hnehna chan har zia min zirtirtu a ni. Chakna kan chan apiangin player-te fak rawn an ni ṭhin a, kan chak loh erawh chuan mawhphurtu chu coach kan ni thung. Kan result-ah hian mawhphurtu ka ni a, zanin kan hun tawn hian thil tam tak min zirtir a ni. Kan team tana ṭha ber tura ka ngaih angin player ka rem a, vawi thum shot an neihah goal hnih an rawn khung ta si a ni," a ti.
Atletico an tho
Diego Simeone-a enkawl Atletico Madrid-in an league match hmasa pahnihah kai-thar Alaves leh Leganes hma-chhawn-in an inhnehtawkpui ve ve a, Atletico thiampuipa Antoine Griezmann-a'n an khelh dan ngai renga an khelh chuan relegation battle an hmachhawn a ṭul tur thu a sawi.
Inrinni zanah erawh Atle-tico an insiamṭha chiang hle -khualmualah Celta Vigo chu 4-0 in an sawp. Koke-a'n goal hmahruai a khung hnuah French forward Griezmann an goal hnih a khung chhunzawm a, Angel Correa-a'n hun tawp dawnah goal khat dang khung ve leh bawkin mualneitu team-in tih theih an nei lo.
Simeone-a lawm
Atletico Madrid coach Diego Simeone chuan, "Hnehna kan chan avangin ka lawm a, kan khelh dan kha Atletico a-
ṭanga kan beisei tur chu a ni. First half-ah kha chuan team pahnih kan inbei tawk a, Koke-a'n goal hmahruai a khung hnuah erawh kan nawr apiangin kan hlauhawm em em zel a ni," tiin a naute khelh dana a lawm thu a sawi.