December-a lo kir tur Saina

Hliam vanga chawl mek Saina Nehwal chuan December thlaah a inkhelh leh theih tawh a beisei a, tun hma zawng aia ṭha zawka a lo kir tur thu a sawi chhuak.

India tana Olympic badminton inelnaa medal la hmasa ber Saina hi kumin Rio-ah khan a khup hiam vangin beisei a phak lo a, knockout round lut loin tun thlengin a la inkhel thei rih lo.

Kum 26-a upa Saina chuan, "Ruahman leh duhthusama thil a kal a nih chuan December thla a khelh tur Dubai World Superseries Finals-ah chuan ka inlan theih ka beisei. Inelna hmachhawn leh tur chuan 100%-a dam ṭhat phawt ka duh a ni," tiin a sawi.

London Olympic bronze medalist chuan sawi chhunzawmin, "Tun hnai kum nga liam ta vela ka khelh ṭhat ṭhin ang aia ṭha khan kum hnih emaw, kum thum emaw lo awm turah hian ka la khelh chhuah theih ka beisei," a ti. Hyderabad nula hi world number 1 hial pawh a lo ni tawh a, tun hnaia beisei ang result a neih hleih theih loh avangin ranking-ah 9-naah a awm mek.