Higuain-a'n goal a keng tel

Pound maktaduai 75 man striker Gonzalo Higuain-a'n Juventus tana bul a ṭan hmasak berah goal hnih a khung a, Old Lady-in Sassuolo 3-1 in an hneh. Inkhel dangah Argentine striker club hlui Napoli-in Palermo 3-0 in an sawp bawk.

Kum 29-a upa Higuain hian Serie A ṭan niah bench aṭanga lutin Fiorentina lamah chakna goal a khung tawh a, Juventus hi match thum khelhah la chak vekin Argentine striker hian goal thum a khung tawh.

Sassuolo an hmachhawn ṭum hian Higuain bakah player thar Miralem Pjanic chu a vawi khat nan a inlan a, Roma aṭanga Juve zawmtu Bosnian midfielder hian goal khat dang a khung.

Argentine forward Higuain chuan, "Keimahah pressure a awm lo a, ka ngaih pawimawh ber chu chak a ni. Team pumpui kan khelṭha a, Dybala nen kan khelh dan hmang kan inhrethiam tawh hle," tiin a sawi. Old Lady hian tlar hmaah Higuain, Pjanic leh Paulo Dybala te an dah a, Juve trio hi an vul chhoh zel beisei a ni.

Napoli-in an match hmasa berah Pescara laka point khat chiah an hlawhchhuah hnuah Milan 4-2 in an hneh. Inrinni zana Palermo an sawp ṭum hian Marek Hamsik-a'n goal khung hmasa berin Jose Callejon-a'n goal hnih dang a khung belh.

Kum 29-a upa Hamsik hian Serie A-ah Napoli tan goal 82 a khungna chiah a ni a, Naples khaw ngaihsan rawn Diego Maradona aiin goal khatin a khung tam tawh. Slovak midfielder tluk loh chu 1930 chhoa goal 102 khungtu Antonio Vojak chiah a ni ta.

Hamsik chuan, "Record ṭha tak neih hi mimal angin a lawmawm a, kei erawhin team chak hi ka ngai pawimawh. Midfielder ka nih avangin record ding lai hi ka khum theih ka inbeisei lo," tiin a sawi.