Bayern chak laiin Dortmund chak lo

Bundesliga champion Bayern Munich chuan an nomawi humhim turin kawng dik an zawh chho zel. Carlo Ancelotti naute hian Zirtawpni zan khan khual mualah Schalke chu 2-0 in an hneh, hetih lai hian an elpui Borussia Dortmund chu RB Leipzig lakah 1-0 in an chak lo thung.

Italian manager kaihhruaina hnuaiah Bayern hi an la chak vek a, an khelh ṭhat loh zanah pawh hnehna an chang. An match hmasa berah Werder Bremen 5-0 in an sawp tawh a, Schalke lakah hian Robert Lewan-dowski (81') leh substitute Joshua Kimmich (90+2') ten goal an khung.

Poland internatonal Lewandow-ski hian tun season league match vawi hnih khelhah goal li a khung leh der tawh. Bayern tan hian kum 19-a upa Renato Sanches chuan a club thar tana a match hmasa ber a khel a, pound maktaduai 27.5 man Portuguese midfielder hian beisei a pha lo.

Bayern Munich coach Ancelotti chuan, "Kan rinlawk ang ngeiin Schalke kha an khauh hle a, kan dawhtheih a ngai hle a ni. Lewan-dowski te ang inkhelha danglamna thlen thei kan nei hi kan vannei a, point thum hlu tak kan hmu," tiin a sawi.

Hei le Leipzig

Kai thar RB Leipzig chuan Red Bull Arena-ah minute 89-naa Naby Keita goal khung hmangin Bayern elpha tura ngaih Dortmund chu 1-0 in an hneh.

Thomas Tuchel a enkawl Dort--mund hian midfielder Andre Schurrle, Mario Gotze leh striker Pierre-Emerick Aubameyang te hmangin hun ṭha nei mah se an chhawr ṭangkai thei lo. Season hmasa a Tuchel-a'n a enkawl aṭangin league match-ah bik tun ṭum hi goal zawna vawi khat chauh an pet ṭum khatna a ni hial.

Dortmund coach Tuchel chuan, "Kan tlar hnung leh midfield an khelṭha lo a, hun ṭha insiam thei mah ila goal kan khung miau loh chuan a vanduai thlak a ni. A tawpa goal kan chhuah kha chu kan beisei loh thil a ni," tiin an result-a a lungawi loh thu a sawi.