Manchester khawpui a pawl

Pep Guardiola-a hoin Manchester City-in Old Trafford an luhchhuah a, Jose Mourinho-a'n Manchester United thuam ṭhat nan khawvel player manto ber ni turin Paul Pogba lei let mah se Arab sum mawm a chawm City leh Spanish manager thluak an ngam lo.

Manchester City-in 100% chak record chhawm nung turin Inrinni tlaiah Kevin de Bruyne (15') leh Kelechi Iheanacho (36') te goal hmangin an ṭhenawm United 2-1 in an hneh a, Red Devils tan Zlatan Ibrahimovic-a'n minute 42-naah City keeper thar Claudio Bravo tihsual zarah a khung.

Mou ngam loh Pep

City player zinga ṭha bera chhal ngam Sergio Aguero hrem vangin derby-ah a inlan thei lo a, captain Vincent Kompany chhawr theih tur khawpin a fitness a la ṭha lo a, midfield fawng chelh tura ngaih Ilkay Gundogan a la khel thei lo bawk. Heti chung hian inkhelh ṭan hma hauhin Pep Guardiola-a'n inkhel thunun an tum thu a sawi a, Spanish manager-in a umphak loh ṭawngkam a chhak chhuak loh tih Old Trafford-ah a lang.

Jose Mourinho hoten 39.9% chauh ball possession an nei a, 2003-04 season hnua United-in derby match-a an muala ball an chan tlem ber ṭum a ni. City ball in pass dik zat hi 485 a nih laiin United erawhin vawi 283 chiah an in-pass dik. Pep Guardiola hian Mourinho kaihhruai team hi vawi 17 a hmachhawn tawh a, Spanish manager hote hi vawi riat (D6, L3) an chak. Spain rama a chungnun ang thoin England-ah pawh Pep a chungnung.

Vawi 50 nan De Bryune

Manchester Derby hi vawi 172 khelh a ni tawh a, tun ṭum hi City vawi 50 chakna a ni. United erawh sulhnu nei ṭha zawk tih takah a chak hnem zawk la ni zelin vawi 71 an chak tawh a, an inhnehtawk zat hi vawi 51 a ni thung. City-in hnehna an chan theih nan Chelsea-a Mourinho chhawr duh loh kum 25 a upa De Bruyne a langsar a, Belgian midfielder hian United tlar hnung a chaih phar hneh hle.

Minute 15-na leka Aleksandar Kolarov ball petchhuah chu Nigerian rawlthar Kelechi Iheanacho-a'n United defender thar feet ruk leh inches hnih zeta sang Eric Bailly chu chiang takin a tauh khalh a, Daley Blind-a'n a dinna a dik lo tih a hriat meuh chuan De Bruyne-a'n keeper David de Gea chiah hmachhawn tawhin Belgian midfielder hian 'cool' takin a khung.

Minute 36-naah De Bruyne-a'n United defender-te bum kualin a ball pet chuan goal ban a per hnuah vengtu nei lo Iheanacho-a'n awlsam takin a khung. Nigerian defender offside loh chhan hi Beligan midfielder bum chian ber Blind-a insiamrem hman loh vang a ni.

United an vannei a, second half-ah substitute Leroy Sane-a pass chu De Bruyne hian kawh zetin pet mah se goal ban a per hnuah goalline hrulah kalin goal chhungah a lut lo.

Hart thlaktu Bravo

City ṭantute ngainat Joe Hart chu Pep Guardiola-a'n a hnuaia khel tlaka a ngaih loh avangin pound maktaduai 17-in Claudio Bravo an lalut a, Barcelona keeper hlui hian England no. 1 a thlak avangin a chungah beisei a sang hle.

Chilean keeper Bravo hi goal hmahruai luh theih nana Kolarov ball petu a ni a, pass naran tak a nih avangin sawi zui tlak pawh a ni lo. Minute 90 chhungin langsar takin Bravo hi vawi hnih ngawt a chesual a, minute 42-naa freekick aṭanga Wayne Rooney pet chu Chilean keeper hian thlauhin Ibrahimovic-a'n a volley goal a chiang hle.

Second half-ah Bravo hian ball sem kual a tumna lamah ball a la per hret a, chan leh tumin Rooney tlawh mah se referee Mark Clatenburg-a'n penalty a pe lo. Arsenal legend Ian Wright chuan, "Hart meuh an chhuahtir avangin a ṭha viau turah ka ngai a, a tihsual a ho lulai deuh a ni. Rooney kha a ball boot hling hawi zawnga a tlawh avangin penalty tur a ni," tiin City keeper-in a beisei a phak loh thu a sawi.

City boss Pep erawhin a keeper chhanin, "Kei chuan ball keng ngam keeper ka duh a, first half-a kan khelh ṭhat chhan pawh kha Claudio a ni. Second half-ah pawh khan huaisen takin a khelh dan ngaiin a khel zui zel a, a rilru put hmang khan ka lawm zawng a ni," tiin a tihsual hnu pawh ball a la sem kual ngam avangin a keeper a fak.

Tisual pawmtu Mou

Jose Mourinho hnuaiah Jesse Lingard leh Henrikh Mkhitaryan ten Premier League-ah inkhel bul an ṭan a, Community Shield-a United goal hmahruaitu khungtu Lingard hian naupang chhia ang maiin tihsual a ngah a, season liam taa Bundesliga player of the season a danglam tam lo.

United boss Mourinho chuan, "Minute 20-naa substitution ka siam loh chhan chu player tihchhiat ka duh loh vang a ni. Minute 45-naa player pathum ka thlak loh chhan pawh khelh tur a la tam vang a ni a, basketball dan angin duh duh zat chu inthlak theih se minute 20-naah khan substitution ka siam ang. Premier League game pawimawh kan khelh hunah chuan boruak sanga talbuai lo player chu ka hre tawh," tiin a tihsual a pawm.

Portuguese coach hian second half
ṭantirhah Lingard leh Mkhitaryan te thlak nan Ander Herrera leh Marcus Rashford te a hmang a, season liam ta derby-a goal khungtu Rashford hian result tidanglam lo mah se inkhel kalhmang a thlak avangin a chanchinin sawi zui a hlawh.

Tun dinhmunah Zlatan Ibrahimovic khawih chet a thiang lo a, derby-a United-in goal zawna an pet vawi li chu Swede striker pet vek a ni a, goal zawna kal lo vawi ruk zinga vawi li chu Ibra ke aṭanga chhuak a ni bawk. Kum 18 leka upa Rashford hi awltir reng a harsat dawn avangin Mourinho-a'n huaisen takin captain Rooney a awltir ngam ang em tihte hi zawhna awm thei a ni.

Eng nge an sawi?

Manchester City boss Pep Guardiola chuan, "Ṭan phat aṭanga a tawp thlenga kan innawr tawn avangin entu lam tan pawh a hmuhnawm ang. First half kan thunun a, second half erawh khelh a harsa. Counter attack hmangin goal khung theihna hun kan nei a, kan hmang ṭangkai thei lo. Amaherawhchu khawvela stadium ṭha ber zinga ngaihah kan lenglut a, hnehna kan chang. Ka naute hian huaisenna an nei a, kan result avangin kan lawm a ni. Hun tawp lama ball an vawrh nasa kha chuan ṭawng-
ṭai bak tih theih a awm lo a, dan theih loh chin kan thleng hman ṭep a ni," tiin inkhel hun pum an thunun bik loh thu a sawi.

Spanish manager hian a khelh duh dan sawi zuiin, "England-a ka hun tawp thlengin a tam thei ang ber ball inpek kuala inkhel thunun hi ka tum ang. Minute 90 chhung chu a theih loh tih chu ka hria," tiin United anga ball vawrh an tum loh thu a sawi.

Manchester United boss Jose Mourinho chuan, "First half leh second half kha inkhel dang hlak a ni a, player ṭhenkhat khan beisei an pha lo a ni. Second half-ah erawh huaisenna leh tumruhna kan nei a, result ṭha duhna thinlung kan nei bawk. Goal khung belh tur kan ni a, Mark Clattenburg khan penalty ṭum hnih min pe lo a ni. Claudio khan Rooney a tlawh a, Nicolas Otamendi a handball bawk. Claudio phei kha chu penalty leh red card tur a ni a, Fellaini emaw Rooney emaw khan field laiah ti se chuan freekick an chawi bakah red card an hmu ang. Penalty area-ah chuan thutlukna siam a harsa ṭhin a, a pe ngam lo a ni ang," tiin an chak loh chhanah referee a dem.

Minute 90 zawhah erawh coach inhal taka an sawi Pep leh Mourinho te puitling takin an inchibai a, khelmuang chhunga inbeihna erawh a ṭanna chauh a ni. City hian Thawhlehni zan hian Champions League group match hmasa berah Borussia Monchengladbach an mikhual dawn a, United-in Europa League khel turin Ningani zanah De Kuip, Rotterdam-ah Feyenoord an tlawh thung ang.

Player Manto lamah Record!

2015 El Classico-a inkhel bul ṭantu player-te kha transfer fee-a an man zat belkhawm chu pound maktaduai 562 a ni a, Inrinni tlaia Manchester Derby-in rawn khumin inkhel bul ṭantu player man zat belhkhawm kha pound maktaduai 570 a ni.

Nipui transfer-ah Manchester United leh Manchester City ten pound maktaduai 149.5 leh pound maktaduai 168 an hman avangin player manto lama record a awm pawh a mak hran lo.