Anfield-ah Premier League champion an zawr!

Liverpool-in tun season-a an home match hmasa berah Premier League champion Leices­ter City 4-1 in an sawp a, Anfield-ah Foxes player te tih tur hre loin an hawihai.

Reds tan Roberto Firmino chuan goal hnih a khung bakah Sadio Mane leh Adam Lallana ten goal khat ve ve an khung bawk a, Leicester tan Lucas Leiva tihsual vanga Jamie Vardy goal khungin awmzia a nei pha lo.

Anfield-a inkhel hi mipui 5,4000 zetin an en a, kum 1977 hnua Liverpool-in inkhel entu a ngah ber ṭum a ni a, mipui tam theih chhan hi mi 8,500 lenna tur stand thar siam a nih vang a ni.

Reds an hmuhnawm

Jurgen Klopp-a hnuaia indin­thar mek Liverpool an hmuhnawm takzet a, tlar hma lama tha za rual Roberto Firmino, Daniel Sturridge leh Georginio Wijnaldum te inkawp chu Leicester tlar hnung kum tam tawhten an chelh meuh lo. Inkhelh ṭan aṭanga minute 13-na lekah Reds hian goal hmahruai an khung nghal a, he goal luhna tura left-back a khel James Milner through ball a ṭhat tluk zetin pet goal tura Robert Huth bumtu Firmino che vel a hmuhnawm hle.

Minute 31-na a ni a, mualneitu team bawkin goal an khung. Jordan Henderson-a ball pek ṭha tak chu Daniel Sturridge-a'n mawi taka lo kheng zeuhin Sadio Mane tan a siamsak a, Senegal forward tan khung harsa a ni lo.Liverpool-in inkhel thunun chhunzawm mah se minute 38-naah centre-back a khel Lucas Leiva a chesual a, ball kalsual nangchingtu Jamie Vardy-a'n chiang zeta khungin Foxes tan beiseina thar a siamsak.

Phur thar Leicester an van­duai a, goal an khung aṭanga minu­te sarih lekah firsthalf a tawp avangin secondhalf-ah an khelhṭhat an chhawm nung thei lo a, chawlhlawk hmang ṭangkai zawk chu Liverpool an ni. Minute 56-naah Adam Lallana a inlar a, England tana a goal hmasa ber khung hlim midfielder hian goal 'special' bik khungin Liverpool hmahruaina a belhchhah.

Reds-in an la duhtawk lo cheu - Mane-a'n Kasper Schmeichel a tlan hel hnuah duhsak takin Firmino tan a siam sak a, Brazilian striker tan ṭhian ṭha duhsakna goal hmanga chhanlet loh chi a ni lo. Foxes keeper Schmeichel hian vawi sarih zet save a nei a, hetichunga Reds-in goal li an la khung tho hi an khel ṭha tih loh rual a ni lo.

Khawiah nge Leicester?

Leicester City manager Clau­dio Ranieri-a'n transfer tawp nia pound maktaduai 29-a a lei striker Islam Slimani a inlan tur thu sawi mah se Algerian striker hi hmuh tur a awm lo a, Nigeria international Ahmed Musa pawh bench lamah hun hman tir a ni.

Foxes tan season hmasaa league nomawi an chawi theihna tura starting XI regular zingah Chelsea pantu N'Golo Kante chiah awm loin a aiah Ghana midfielder Daniel Amartey-a'n a khel a, Anfield-a an khelh dan en erawhin Foxes hi season hmasaa Premier League champion khelhin an khel lo.

Ranieri-a naute hian Liverpool goal zawnah vawi thum chiah an pet a, Lucas tihsual vanga goal khungtu Vardy-a'n Riyad Mahrez ball pek ṭha tak hmanga a hun ṭha neih Simon Mignolet-a'n a lo dan sak hman chu a ui khawp ang - Nilaini zana an Champions League match hmasa ber Club Brugge khelmuala khel tur Leicster hian Vardy, Mahrez, Musa leh Slimani an neih miau avangin Premier League aṭanga thai bo nan erawh chuan a la hma deuh.

Manager thukhawchang

Liverpool boss Jurgen Klopp chuan, "Team ṭha tak hmaah game harsa tak kan khel a ni. He team hian game hmuhnawm tak pholang turin theihna kan nei a, kan chetsual vangin goal chhuah mah ila hlauthawng miah loin kan bei let thei tih kan lantir a ni. He league-a ṭang mar pat tur chuan kan chakna ngai reng hi kan neih a ngai, eng chen nge kan thlen theih ang tih lam ka ngaihtuah lo. Anfield-a kan inlan hmain away match pali kan khel hman a, huaisen tak leh nuam ti taka beih zel hi kan tih theih chu a ni," tiin a sawi.

Leicester boss Claudio Ranieri chuan, "Liverpool khan an khel
ṭha takzet a, hnehna chan kha an phu a ni. Bul ṭan ṭha mah ila goal hmasa ber kan chhuah hnuah kan talbuai nghal. Secondhalf-ah thawhleh ngei tumin kan bei a, mah se Liverpool-in an tihve apiang kha a kaltluang bik em em mai a ni. Chance pawh kan insiam ve ngei a, kan vanduai a ni. Tunah erawh kan match neih leh hmasak ber tur kan thlir a ṭul a, kan chak loh hnu lawkah game ṭha tak kan lo khel tawh ṭhin," tiin hmabak eng takin a thlir.

Inkhel Chhehvel

• Liverpool-in Premier League champion lai vawi 20 an nei tawh a, champion lai laka record nei ṭha ber an ni.

• Leicester-in goal li an chhuah a, Premier League champion-in vawi li aia tam goal an chhuah vawi 14-na a ni.

• Liverpool-in kum 2016 Premier League-ah goal 50 an khung tawh a, anni aia khung hnem an la awm lo.

• Mane-a'n a Premier League match hnuhnung pariatah goal riat a khung tawh!

• Vardy-a'n league-a Liverpool a hmachhawn hnuhnung pahnihah goal thum a khung a, Premier League-a a match hnuhnung pariatah goal sarih a khung tawh bawk.