Real-in goal an khung lo

Spanish champion Real Madrid chuan season thar atana an match hmasa ber chu Pathianni zan khan an khel a, Real Sociedad khelmualah goal an khung lo - inkhel tawpa result chu 0-0 a ni. 

Champion lai nichunga match hmasa bera goal hlawhchhuah theih loh hi Real tan chanchin lawmawm loh a ni a, league match la khel ve lo Barcelona tan erawh hriat a nuam khawp ang. Real-in hnehna an chan zawh loh avangin La Liga-a an season hnuhnung pariata an match hmasa berah vawi nga ngawt chu hnehna an chang zo lo ta tihna a ni.

Mualneitu Sociedad tan Manchester City legend David Silva a inlan thei a, Spanish playmaker hian a club thar tana a match hmasa berah goal erawh a keng tel bik lo.

Season hmasa lama beiseina sang tak nena Real Madrid pantu Eden Hazard-a tan mangchhia a la reh hleithei lo a, Belgian forward hian hliam vangin season bul a ṭan thei lo. Kum 29 mi Hazard hian season hmasa khan hliam vangin Real tan inelna hrang hrangah match 22 a khel thei hram a, goal khat chiah a khung! Real-in La Liga nomawi chawi mah se Hazard tan erawh theihnghilh tlak season a ni. 

Cristiano Ronaldo hmun ruak luah zo tura an beisei hi pound maktaduai 150 zetin Real hian an lalut kha a ni a, a man phu anga a la khelhchhuah lohzia chu hrilh nawn kan ngai lo. 

Hliam a neih miau avangin Hazard hi 'vanduai' ti pawhin a sawi theih a, tun season-ah hliam vang bawkin season bul a ṭan lo - a kum a tlem tawh bik loh avangin kuminah a insiamṭha lo a nih chuan Chelsea a kan hmuh ṭhin Hazard kha kan hmu tawh kher lo mai thei. 

Real squad-a player langsar zinga mi Gareth Bale chuan loan-a Tottenham Hotspur-a zawm bawk avangin Zinedine Zidane-a'n Brazilian rawlthar pahnih Vinicius Junior leh Rodrygo chungah rinna a nghah a ngai a, an hriam tawk lo. 

Player pahnih hi hmabak nei êng tak ni mah se rinrawla neih atan chuan an la nau hret niin a lang a, player pahnih hian tun season-ah an theihna an pholang a nih loh chuan fan-ten an dem rawn tur chu Zidane-a a ni. 

Zidane hian player theihna nei sang bik Bale meuh pawh a ring zo lo a, a rin loh vanga a chhuahtir James Rodríguez lah Premier League-ah match hnih chauh a la khel chungin a tlangnel em em bawk. 

Hetiang boruak karah Real berin goal an khung lo a, season hmasaa Barcelona talbuai lai tawng chunga champion Real hian Pathianni zana an khelh dan nen chuan league nomawi an humhim lo tawp ang.

Real hian an khel chhia kan tih rualin chance nei lo tawp erawh an ni bik lo a, Sociedad lakah hian pet goal tumin vawi 16 zet chu shot an nei a, target zawna kal erawh pali chiah a ni. 

Zidane-a naute tana chance duhawm ber tia chhal ngam chu a striker 'duat' Karim Benzema ke bulah a tla a, mahse French striker hun ṭha neih hi Sociedad goalkeeper Alex Remiro chuan a lo dansak. 

Spanish keeper Remiro hian Toni Kroos-a chance ṭha neih a dansak bawk a, Dani Carvajal-a long range shot dang turin harsatna a nei lo bawk - kum 25 mi goalkeeper hian May thla khan Covid-19 a kai a, a dam tawh tih khelmualah a lang chiang. 

Real player zinga mit la pakhat chu Norwegian midfielder Martin Odegaard a ni a, season hmasaa Sociedad-a loan-a a khelh laia hun duhawm hmangtu hian Real-a hun rei tak hmang turin theihna a nei. 

Sociedad ve thung

Season hmasa La Liga-ah Sociedad hi team hmuhnawm zingah an tel pha a, Covid-19 vanga league tihtawp a nih lailawk hma thleng kha chuan Champions League khelh pawh an beisei hial. Mahse, season chawhnu lamah beisei an phak lo a, hetichung hian table-ah parukna niin tun season-ah Europa League an khel dawn. Real lakah pawh hian chance duhawm nei lo an ni bik lo a, Alexander Isak-a shot chu Thibaut Courtois chuan a dansak bakah Ander Barrenetxea chuan a chance duhawm a khawhral bawk. 

Kum 20 mi Alexander Isak kha a naupan anga en chi a ni lo. Sweden tan vawi 13 inlana goal li khung tawhtu hian season hmasa khan inelna hrang hrangah match 44 khelin goal 16-a khung a, assist vawi thum a nei bawk. Isak hi minute 63-naah David Silva chuan a rawn thlak a, Spanish midfielder hian danglamna erawh a thlen thei lo. Kum 23 mi Mikel Oyarzabal kha chhinchhiah a fuh bawk ang - ani hian season hmasa khan inelna hrang hrangah match 44 khelin goal 12-a khung a, assist vawi 12-a nei thei!