Vinales a tlan chak ber
Maverick Vinales chuan tun season chhunga a vawi khat nan hnehna a chang. Pathiannia tlan zawh tak Emilia Romagna MotoGP-ah hun rei tak hmahruaitu Francesco Bagnaia chu lap pasarih chauh tlan hmabak a neih tawhah a chesual, Yamaha rider Vinales a vanneih phah.
Misano World Circuit-a intlansiakah a hmasa ber aṭanga tlan ṭan Vinales hi pahnihna dinhmun luah zawk tura ngaih ni mah se, a hmaa tlan a chetsual avangin a tlan kawng a inhawng - minute 41 leh second 55.846 chhungin a thleng.
Vinales hnungah hian Joan Mir a thleng a, Suzuki rider nen an inkarah hian 2.425 seconds a awm. KTM rider Pol Espargaro chu pathumnaah thleng bawkin, dawhsan (podium) lawn chin chu Spanish tlangval vek an ni.
Kum 25 mi Vinales chuan, "A tir lamah khan ṭang viau mah ila risk ka la duh lo, lap hnuhnung 10-ah kha chuan eng pawh thleng thei a ni tih ka hriat avangin thapui ka thawh, khami tur atan khan tyre ka khek bawk.
"Ka hma a awm Bagnaia kha a tlan ṭha em em a, vanduai lo se la chuan ka tan umphak beiseiawm a ni kher lo. A tihsual avangin a pawi ka ti, inelna hautak leh khirhkhan min chhawp chhuahsak a ni," tiin a sawi.
A vawi 200 nana podium lawn tum Valentino Rossi-a'n a tum ram a la thleng thei rih lo. MotoGP vawi sarih champion tawh hi lap hnihna lekah a chesual, intlansiak hmain ruah a sur a, kawng huh vangin rider ṭhenkhat chuan beisei an phak lo.
MotoGP champion lai Marc Marquez a awm loh hlanin roreltu mumal an awm hleithei lo. Season kal laiah intlansiak pasarih awm tawhin rider hrang hrang paruk ngawtin hnehna an chang tawh, champion nomawi chawi theihna kawng a inhawng zau hle tihna a ni.
Emilia Romagna MotoGP, Misano - Race Results
# Rider Ram Team Time/Diff
1 Maverick Vinales SPA Yamaha 41m 55.846s
2 Joan Mir SPA Suzuki +2.425s
3 Pol Espargaro SPA KTM +4.528s
4 Fabio Quartararo FRA Yamaha +6.419s
5 Miguel Oliveira POR KTM +7.368s
6 Takaaki Nakagami JPN Honda +11.139s
7 Alex Marquez SPA Honda +11.929s
8 Andrea Dovizioso ITA Ducati +13.113s
9 Franco Morbidelli ITA Yamaha +15.880s
10 Danilo Petrucci ITA Ducati +17.682s
Championship Table
# Rider Ram Team Points
1 Andrea Dovizioso ITA Ducati 84
2 Fabio Quartararo FRA Yamaha 83
3 Maverick Vinales SPA Yamaha 83
4 Joan Mir SPA Suzuki 80
5 Jack Miller AUS Ducati 64
6 Franco Morbidelli ITA Yamaha 64
7 Takaaki Nakagami JPN Honda 63
8 Miguel Oliveira POR KTM 59
9 Valentino Rossi ITA Yamaha 58
10 Pol Espargaro SPA KTM 57