Durand Cup Samthang tlangvalin nomawi a chawi ta
Durand Cup vawi 128-na khelh hmain Mizoramin PC Lallawmkima a hre lo a, tunah erawh Aizawl FC hnehtu leh khawvela inelna upa ber pathumna champion Army Green captain Samthang tlangval hi India rama football ngaina chin tan hriat loh a mawi tawh lo.
Pathianni zan khan Ambed-kar Stadium-ah Army Green leh Neroca ten final an khel a, extra time thlenga goal a luh loh hnuin penalty shootout-ah 6-5 in Army team an chak.
AFC faktu PC-a
Army Green captain PC Lallawmkima chuan, "Semi-final-a Aizawl FC kan khelh ṭum kha chuan kan hneh lo zawk a, final-a Neroca nen kan inkhelh
ṭum chuan kan inhnehtawk. Goal khungna chance pawh kan nei nual a, a vannei zawkah kan
ṭang," tiin an chungnung bik loh thu a sawi.
Army Green hian semifinal-ah penalty hmangin Aizawl FC an hneh a, MPL champion hian tualchhung football-a an damna penalty chu India ram pum huap inelnaah thih nan an hmang. I Day Football cham-pion turin AFC-in final-ah Ramhlun North penalty hmangin an hneh a, MFA Super Cup semifinal-ah Bethlehem VT penalty hmangin an hneh bawk.
Chenna ngai loh ram
Army Green leh Manipur club Neroca te an la champion ngai lo a, fitness nei ṭha zawk Army team-in an duhthusam ram an thleng. Champion team hian cheng nuai 45 an dawng a, pahnihna hian nuai 20 dawngin semifinalist Aizawl FC leh DSK Shivajians ten nuai nga ve ve an dawng.
Asia rama inelna upa bera Army team an champion ṭum chu kum 2005 daih tawh kha a ni a, team ṭha lo zawka ngaih Army Green phei chu an la champion ngai lo. Tun ṭumah erawh Army Green-in Mizo tlangval an nei a, PC-a hian semifinal an luh theih nan goal nga khungin, Aizawl FC leh Neroca penalty hmanga an hneh ṭumin a pet hmasa ber ve ve a, goal-ah a chantir ve ve bawk.
Samthang aṭangin
India ram huapa lar pha Mizo footballer ṭha tak tak an tam tawh a, Samthang tlangval PC Lallawmkima erawh mumala inzir a ni lo. Footballer tam zawk hi chu MFA thawhrah zara par an ni a, PC-a erawh eizawn nan football thlang loin sipai a ṭan a thlang a, football tui lo erawh a ni lo.
Naupan lai hun sawiin PC-a chuan, "Inkhelh hrim hrim hi chu kan naupan lai aṭangin ka hrat em em a, Pathianniah pawh a ruka Rs 10 inchawia inkhel
ṭhin kan ni. Mumala football zirna ka nei lo a, krismas thawmhnaw aia ball boot lei kan thlan ṭhin avangin boot hi chu ka nei ve leh mai zel. Chhungte hian kan rual awh an hlau a, krismas thawmhnaw hi chu min lei ve leh tho zel," tiin naupan lai aṭanga football a tuichilh thu a sawi.
Samthang tlangval hian Ai--zawl khelmuala inlan theih-na tur hun ṭha a nei lo a, Mizo-ram a awmchhunga inelna a hmachhawn tawh chu School Games leh Tuipuiral Tournament a ni mai a, nomawi chawi pha zingah a tel ngai lo. Kum 2011 khan sipaiah ṭangin kum khat hnuah Inter Regiment inelnaah an champion nghal a, an center aiawh 'Nashik team' a khel tura thlan a ni.
Area team inelnaah erawh result ṭha an nei lo a, champion se chuan Command Team-ah lutin Army team tana tel turin trial a ngai tawh lo ang. Amaherawhchu 24 September 2014 khan Army trial aṭangin Green tana khel turin thlan a ni a, hemi ṭum hian Blue (Junior team an ti ṭhin bawk) tana khel turin a tling bawk.
Kum 2014 hian Army Green hi Durand Cup an khel tawh a, PC-a erawh squad-ah a tel pha lo. Kum hnih hnuah erawh Sam-thang tlangval hi squad-a player satliah ni loin team captain a ni.
Thawhrimna leh ṭawngṭaina
Army team danglamna sawiin PC-a chuan, "Practice loh lai kan nei lo a, kan thawkrim em em. Civil club nena kan danglamna chu fitness a ni ber a, sipai chu kan rorum zawk. Kan hneh loh ṭum chuan thudang daih ni se sipai chuan inkhelh chhung zawngin zuai lai kan nei ve lo," tiin inpuahchahna an neih ṭhat thu a sawi.
Army Green captain PC-a chuan sawi chhunzawmin, "A hmasa berah Pathian vang liau liau a ni. Ka nu hi bang loin ka tan a ṭawngṭai ṭhin," a ti. Insum theihna a pawimawh thu sawi zuiin Samthang tlangval chuan, "Sipai a ka ṭan hma hian zu han in ve leh zeuh hi ka nei ṭhin a, tunah chuan ka sim hmak tawh. Infiammi ni tur chuan ruih theih thil bakah mipat hmeichhiatnaa fihlim a ṭul a ni. Insum theihna kan neih chuan Pathian hian min hlamchhiah ngai lo a, malsawm tlaka nun hi a pawimawh a ni," tiin nun uluk a ṭul thu a sawi.
Samthang lamah
PC Lallawmkima hi a pain sipaia a ṭantirh lai vel hian a thihsan a, Pathianni tlai final hi PC-a nu Thanpuii Sailo hoin Samthang-a an inah ṭhenrual
ṭhaten an en ho. Amah ṭantute chungchang sawiin PC-a chuan, "Samthang mipuiin ka inkhel an en ho tih ka hriat khan ka zam phah lo a, ka phur phah sawt. Kan khaw mipui chungah ka lawm em em a, Samthang khua nih hi a lo nuam ber mai. Group engkimah ka chanchin hlir an sawi a, ka chhungte a bik takin ka nu min ṭawngṭaipuina rah a ni," tiin Vanglaini palai a hrilh.
Army Green captain hian a nu hmangaihna leh a pa fuihna a theihngilh ngai loh thu a sawi a, tun dinhmun a thlen theih chhan hi a nu leh pa vang a nih thu a sawi tel bawk.