Spurs zawmtu Reguilon a lawm

Tottenham Hotspur-in Real Madrid aṭanga Gareth Bale an lak let rualin left back Sergio Reguilon an lalut bawk a, Spanish defender hian a player ngaihsan Bale-a hnung zuia Spurs a zawm thei chu a lawm thu a sawi. 

Spanish left back chuan Champions League 2010-a Spurs leh Inter Milan inkhel a en aṭang khan Bale a ngaihsan thu sawiin, "Inter nena an inkhel kha ka en a, kha ta ṭang khan ka player ngaihsan a ni zui ta a ni," a ti. 

Real Madrid youth system chhuak defender chuan, "Inter a hmachhawn aṭang khan Bale hi ka en zui a, YouTube lama a video thlengin ka en a, ka ngaisang em em. A hming chuanna jersey leh lehkhabu thlengin ka lei a, amah lam hrim hrim chu ka lei a ni ber mai.

"Bale nen ngeia amah siam liantu Spurs zawm theih hi a lawmawm takzet. Thlawhtheihnaah kan rawn chuang dun a, twitter lama amah ka ngaihsan thu ka ziah te leh thil dang dang ka hmuh a, ani pawhin nuam a ti hle," a ti. 

Kum 23 mi Reguilon hian season hmasa kha Sevilla-ah loan-in a khel a, inelna hrang hrangah match 38 khela goal thum khungin Europa League-ah champion nomawi a chawipui. Real Madrid tan hian kum 2018 khan a inlan ve ṭan chauh a, 2018-19 season-ah hian inelna hrang hrangah match 22 a khel. Loan-a a khelhna Sevilla-ah a chet ṭhat zui avangin Liverpool pawhin an thli thlai hman a, Manchester United nen pawh sawizawm a ni. 

Mahse, Real hian an player hi an chhuahtir a nih pawhin lei let theihna dan 'buy-back clause' chu a contract-ah ziah tel an duh avangin United an inhnukdawk a, Spurs-in an chang ta. Reguilon hi a man zat tarlan ni lo mah se Real hian an lei let duh a nih chuan pound maktaduai 27.5-a an lei let theihna dan a inziak a, Spurs-ah hian kum nga chhung atan contract-a ziak.