Nice tan Balo goal hnih

Liverpool aṭanga Nice zawmtu striker Mario Balotelli chuan French club tana a match hmasa berah goal hnih a khung nghal a, a club thar hi Marseille lakah 3-2 in hnehna a chanpui.

Italian striker hian minute 7-na lekah penal-ty aṭangin 'cool' takin goal hmahruai a khung a, minute 78-naah a goal hnihna tauh lut leh bawkin duhthusama ṭhain a club thar tana a match hmasa ber a khel.

Liverpool-in a thlawna Nice lama an kaltir striker hian inkhelh ṭan hmain a club hlui a sawisel a, Liverpool zawm tura thutlukna a lo siam chu a nuna thutlukna a siam tawh zinga a tih sual lian ber a nih thu a sawi!

Kum 2014-a Milan aṭanga pound maktaduai 16-a Liverpool a zawm hnua vawi 28 inlana goal li chiah khungtu striker chuan, "Liverpool-a hun ka hman chhunga ṭha taka min ṭawiawmtu fan-te leh player ṭhenkhat ka kawm ngeih em em te sawi tel loh chuan Liverpool kha ka ngaina lo takzet a ni," a ti.

Balotelli chuan sawi chhunzawmin, "Coach pa-hnih Brendan Rodgers leh Jurgen Klopp ka hrawn hman ve ve a, mah se coach pahnih mizia leh an game duhdan kha ka ngainat zawng a ni lo," tiin a coach hlui pahnih a dim lo hle.