Champions League Barcelona leh City an inlan dawn

Zanin dar 12:15-ah Cham-pions League khelh ṭan a ni dawn a, group ngaihven hlawhah Barcelona leh Manchester City an inlan nghal dawn.

Barca-in Celtic an mikhual dawn a, an coach hlui Pep Guar-diola enkawl Manchester City nena la inhmachhawn leh tur an nih avangin an match hmasa bera chak nghal hi Catalan club tan a pawimawh ang - Barca tluk zeta chak duh tur chu City an ni. Etihad Stadium-ah Borussia Monchengladbach an mikhual ang.

Celtic Park-ah Barca

Scottish club ṭha Celtic-in kum 2014 hnua Champions League an khelh theih loh avangin beiseina sang tak nen manager atan Brendan Rodgers an lalut a, Liverpool boss hlui hian playoff paltlang puiin an beiseina hmunah Celtic a hruai kai - match hmasa bera Barca lenchilh erawh an ṭawngṭai chhanna a ni lo tawp ang.

Barcelona coach Luis Enri-que-a'n an league match hnuhnung berah Celtic an mikhual tur thlirlawk chungin Lionel Messi, Luis Suarez leh Andres Iniesta te bench-ah a dah a, kaithar Alaves lakah 2-1 in a tlawm. Catalan club an chet chhiat chhunzawm dawn nge Celtic-in sapui thinrim kut an tuar dawn? tih hi thil hriat chakawm chu a ni.

Celtic hi awlsam taka zam mai tur an ni bik lo. Old Firm derby-a Rangers 5-1 a sawp thei hlim an ni a, an phur vanglai tak a ni. History keu let erawh chuan Celtic-in inchhuanna tur an nei tlem hle - team pahnih vawi 10 an inhmachhawn tawh-ah Barca-in vawi ruk hnehna changin Celtic vawi hnih an chak a, vawi hnih an inhnehtawk bawk. Kumin International Champions Cup-a an inhmachhawnah Barca hian 3-1 in hnehna an chang.

Champions League match-a team pahnih an inhmachhawn hnuhnung ber chu 11 December, 2013 kha a ni a, Barca hian 6-1 in Celtic an sawp! He inkhelah hian Santos aṭanga Barcelona zawm hlim Neymar chuan goal thum khungin hattrick a siam a, Brazil captain hi Barca tana a hattrick siamna hmasa ber club lakah a inthlahrung hauh lo ang le.

Tute nge inlan dawn?

Celtic tan season hmasaa inelna hrang hranga goal 40 khungtu leh tun season-a match kua a inlana goal sarih khung tawhtu striker Leigh Griffiths chu hliam vangin a inlan thei dawn lo.

Scotland international hi inlan thei dawn lo mah se Celtic hi indawm kun lutuk tur erawh an ni lo - Old Firm derby-a khelh hmasak bera hattrick siam theitu Moussa Dembele an kawl a, French rawlthar duhawm hi Europe-a forward beiseiawm pawla an sawi a nih avangin Barca tlar hnung chhaih buai turin a ṭha tawk.

Barca hi Suarez, Messi leh Neymar neitu an nih miau avangin an khingpui apiang lakah chak tura rin zawk an ni zel a, zaninah Kolo Toure-a hoin Celtic tlar hnung ten hnathawh tur an ngah hlein a rinawm.

City an la inpeih lo

Manchester City neituten Champions League nomawi chawi ngei an duh a, an duhthusam ti hlawhtling thei tura an ngaih manager Pep Guardiola an lalut - mahse, Spanish manager thusawi chu Europe-a champion beisei ngam tur khawp chuan an team an la ṭhat tawk loh thu a ni!

Bayern Munich coach hlui chuan, "Europe-a inelna hmachhawn tur khawp chuan he team hi kan la ṭha tawk lo a, tlar hmaah player ṭha zawk kan la mamawh. Premier League-ah chuan kan khel ṭha a ni mai thei a, mah se Europe-a club ṭha ber ber hmachhawn tur chuan kan la inpeih lo a ni," a ti a, an vanneihna chu Champions League-a an match hmasa bera Gladbach an hmachhawn tur hi a ni.

Team hmuhnawm City

Pep-a hnuaiah City attac-king football a hmuhnawm a, tun season-a match paruk an hmachhawn tawhah hnehna chang vekin goal 17 zet an khung - Gladbach tan chanchin hriat nuam a ni lo ang. Season hmasaah khan team pahnih hi group stage-ah an lo awm dun tawh a, City-in Etihad-ah 4-2 a hnehna an chan bakah khualmualah 2-1 in hnehna an chang tawh bawk a, an mikhual hmaah zam tur an ni lo.

Hetihrual hian German club hi dah hniam theih an ni bik lo. An match hnuhnung parukah vawi nga hnehna an chang thei a, heng zinga match li-ah hian goal hnih aia tlem an khung ngai lo. Eden Hazard-a unaupa Thorgan Hazard leh Brazilian midfielder Raffael ten tun season-ah German club tan goal li ve ve khung tawhin an innghahna an ni a, an match hnuhnung paruka vawi hnih chiah goal chhuah lo a awm City tan inven uluk a ṭul ang.

City hi Manchester Derby-a hnehna chang hlim an nih miau avangin an phur vanglai tak a ni dawn a, Gladbach erawh Bundesliga lama tlawm hlim an ni thung - hei erawh hriat sak a ṭul, Andre Schubert-a'n September 2015 aṭanga a enkawl hnuah Gladbach-in harhtharna an chang a, Cham-pions League khel tur hian playoff-ah Swiss club ṭha Young Boys chu 9-2 in an sawp!