Bayern tan fiahna hmasa

German champion Bayern Munich-in Champions League-a season thum chhung a zawna semfinal an luh hnuah coach Pep Guardiola an chan a, Bundesliga-a roreltu club hian Spanish manager aiawh tura an lak chu Champions League-a tawnhriat ngah tawh mana-ger Carlo Ancelotti a ni.

Italian manager hian Bayern boss a nih hma-sak berah Pep-a'n season thum chhunga a chawi theih loh German Super Cup a chawi nghal a, Cham-pions League-a Pep-a'n Bayern a thlenpui phak loh a thlenpui thei ang em? tih chu zawhna awm nghal a ni - zaninah Russian club FC Rostov mikhualin fiahna hmasa a hmachhawn nghal ang.

Bayern hian league match hnih an khelh tawhah hnehna changin goal sarih an khung a, goal chhuah an nei lo - Robert Lewandowski-a'n tun season match li a khelhah goal sarih a khung leh der tawh a, Rostov tlar hnung tan Polish striker hi dan hautak tur a ni.

FC Rostov hi 'Russian Leicester' tia hminglem an pek, league-a pahnihna dinhmun an hauh vanga Champions League khel thei an ni a, sulhnu ropui an la neih loh avangin team nem zawk ni tura ngaih ni mah se group stage thleng tura an playoff kalkawngah Belgian club ṭha Anderlecht an hneh bakah Dutch club Ajax chu 5-2 a an sawp theih avangin Bayern tan fimkhur loh ngawt erawh a chi loh ang.

Group D inkhel dangah Atletico Madrid chuan PSV Eindhoven an lenchilh dawn bawk a, nikum finalist Atletico hian PSV nen vawi li an inhmachhawn tawhah vawi thum hnehna chang-in vawi khat an inhneh-tawkpui a, league match lamah Celta Vigo 4-0 a sawp hlim an ni bawk nen phurna nasa tak nen Ne-therlands lam an pan ang.