San Marino-ah Pedrosa a inlar

Pathianni a tlan San Marino Grand Prix-ah Dani Pedrosa chuan Valentino Rossi tlan pelin pakhatna ni. Spanish rider hi kumina MotoGP intlansiaka pakhatna ni thei rider pariatna chiah a ni.

Misano World Circuit Mar-co Simoncelli-a intlansiak-ah pariatna aṭanga bul ṭantu Pedrosa hian lap 12 tlan hmabak a la awm tihah Yamaha rider Rossi a tlan pel a, a tawp thlengin a hawi kir tawh lo. Italian rider hian lap hnihna lekah Jorge Lorenzo tlan pelin beiseina a nei sang hle. Mahse, dan rual loha tlan ṭha Pedrosa hi second 2.8 in a phak lo.

Tun season-ah rider-te an inel tawk hle a, intlansiak hnuhnung pariatah mi hrang hrang pariatin hnehna an chang - MotoGP inelna neih ṭan kum 1949 aṭangin hetiang result a awm vawi khatna a ni hial. Pedrosa bakah hian Rossi, Lorenzo, Marquez, Crutchlow, Andrea Iannone, Jack Miller leh Maverick Vinales ten kuminah hnehna an chang tawh.

Champion lai Jorge Lorenzo chuan pole po-sition aṭangin bulṭan mah se pathumna dinhmun a luah hram, Honda rider Marc Marquez chu pa-li-na-ah a thleng ve bawk. Spain tlangval Marquez hian rider championship-ah point 223 hmuin hmahruaitu a nih chhunzawm zel.

Tun season intlansiak 13 an neih tawh aṭangin Rossi chuan point 180 hmuin Marquez hnungah a awm mek a, point 162 hmutu Lorenzo chu pathumna a ni mek bawk. Intlansiak hmabak panga la awmin inlehpelhna hun a la tam hle. September 25 hian Spanish Grand Prix an tlan leh ang.

Kum 30-a upa Pedrosa chuan, "Mimal takin ka hlim hle. Vawiin khan kan intlansiak chiah ka rilruah a awm a, hnehna ka chan hi ka fans, team leh chhungkaw tan ka hlan," a ti. Pedrosa hian season hmasa khan Grand Prix pahnihna pakhatna niin a pumpuiah palina a ni, kuminah tun ṭum hi a chakna hmasa ber a ni bawk. MotoGP inelna bikah hrim hrim chuan ṭum 52 zet hnehna a chang tawh.

Khawtual tlangval Rossi chuan, "Lorenzo leh Marquez te laka hnehna chang turin ka bei nasa a, pakhatna ni turin ka dinhmun pawh ka siamṭha hman hle. Mahse, Pedrosa a rawn lan takah khan ka chelh thei ngang lo, kei aiin a tlan chak zawk miau a ni," a ti. MotoGP champion vawi sarih ni tawh Rossi hi mipui 100,000 chuang pungkhawm ten an lawmin an ṭan hle.

San Marino MotoGP result:

# Rider Ram Team

1 Dani Pedrosa Spa Honda

2 Valentino Rossi Ita Yamaha

3 Jorge Lorenzo Spa Yamaha

4 Marc Marquez Spa Honda

5 Maverick Vinales Spa Suzuki

6 Andrea Dovizioso Ita Ducati

7 Michele Pirro Ita Ducati

8 Cal Crutchlow GB Honda

9 Pol Espargaro Spa Yamaha

10 Alvaro Bautista Spa Aprilia