Liverpool-ah Sadio Mane a hlim

Nipui bazar-a pound maktaduai 34-a Liverpool zawmtu forward Sadio Mane chuan Anfield-a a hlim thu sawiin hmasawn zel tura a beih tur thu a sawi.

Senegal forward hian Inrinni zana Leicester City 4-1 a an hneh-na inkhelah goal a khung bakah khelmualah a hmuhnawm a, Roberto Firmino goal hnihna tur a siam sak bawk. Second half-a lakchhuah a nihin fan-ten ding chungin Mane hi an thlah.

Kum 24-a upa forward chuan, "Anfield-te ang stadium ropuia kan khel a nih chuan a ṭha thei ang bera khelh kan duh vek a, ka chhuah dawna fan-ten ding chunga min lo lawm kha chu ropui tak a ni," tiin a hlim hle.

Liverpool legend John Barnes leh Luis Suarez nena khaikhin hlawh der tawh Mane chuan, "Player ropui tak takte nena khaikhin ka ni hi ka lawm a, mah se kei chu kum naupang tak chauh ka la ni a, anni nena huang khata dah tur chuan hmasawnna tur ka la ngah em em a ni," tiin inngaitlawm takin a sawi.

Mane chuan club thar zawmin tlangnel nghal harsa ṭhin mah se Anfield-ah chuan ṭhian ṭha tak tak Daniel Sturridge, Philippe Coutinho leh Roberto Firmino te a neih nghal avangin a tan engkim a awlsam thu a sawi bawk.