Roma tan Totti a chul thei lo

Francesco Totti-a'n a hmangaih AS Roma tan goal khung a chawlhsan thei lo. Roma legend Totti hian hun tawp dawnah penalty chhuih lutin Sampdoria lakah a club hi 3-2 in hnehna a chanpui.

Pathianni zan Serie A inkhelah ruahsur nasa vangin Olympic Stadium-ah tui a tling hnem a, second half ṭan hun tih tlai hret a ngaih phah hial.

Roma tan Mohamed Salah-a goal khung chu Luis Muriel leh Fabio Quagliarella ten chhangletin mikhual Sampdoria hian 2-1 in hma hruai mah se inkhel thawhhnihnaah Roma an tho chhuak a, Manchester City striker hlui Edin Dzeko chuan an siphurh a sut bakah hun tawp dawna a penalty hlawhchhuah chu Totti-a'n goal-ah a chantir.

Kum 39-a upa Totti hian Roma tan Serie A season 23 chhung zet chu a zawnin goal a khung ta! A club tan hian league-ah chauh pawh goal 249 a khung tawh bawk - inelna hrang hrangah match 759 a khelh aṭangin goal 305 a khung tling ta chiah bawk.

Roma tana a season hnuhnung ber tur hmang mektu Totti chuan, "Tun ṭum kha penalty pet tura ka hlauhthawn
ṭumkhatna a ni hial ang. Player 11-a inkhel kan nih avangin a pawimawh ber sawi tur bik kan awm lo a, khelmual chhunga ka lut a nih chuan team tan a
ṭangkai thei ang bera khelh ka tum ṭhin," tiin a sawi.

Tun season league match vawi thum an khelh tawh aṭangin Roma hian point sarih an hmu tawh a, pahnihna Napoli nen inzatin hmahruaitu Juventus chu point hnihin an phak lo thung.

Inter chak

Inter Milan manager Frank de Boer-a'n a vawi khat nan a club te hnehna a chanpui ve ta. Pathianni zan khan Inter hian captain Mauro Icardi goal hnih khung hmangin Pescara chu 2-1 in an hneh.