Hnehna nena bul ṭantu Ronaldo leh Pirlo

"Player theihna sang tak neite theihna hi a tam thei ang ber sawr chhuah ka tum," tiin Juventus manager Andrea Pirlo chuan Sampdoria 3-0 a an hneh hnuah a sawi a, a naute chu zalenna zau tak nei chung leh nuamti taka inkhel turin a duh.

Pathianni zan khan Italian champion Juve chuan Serie A 2020-21 an match hmsa ber khelin Dejan Kulusevski, Leonardo Bonucci leh Cristiano Ronaldo te goal khat ṭheuh hmangin hnehna an chang a, midfielder Aaron Ramsey a hmuhnawm bawk.

Juventus hian hliam vangin Paulo Dybala, Matthijs de Ligt, Federico Bernardeschi, Alex Sandro leh Sami Khedira te an chhawr thei lo vek a, buaina tham chu a tling - mahse manager thar Pirlo-a'n fing takin ruahmanna a siam.

Manager chhuak ta Maurizio Sarri khan 4-4-2 hmangin a naute a rem ṭhin a, ball chang tam mah se an goal nawr a na tawk lo. Pirlo erawhin 5-4-1 hmangin a naute a rem thung, match hmasa berah chuan a fuh viau niin a lang.

Cristiano Ronaldo chu tlarhma laiah awmtir a ni a, midfielder Weston McKennie leh defender Gianluca Frabotta te chuan rin loh takin inkhel bul an ṭan. Sarri hnuaia khel mumal phak lo Ramsey chu Ronaldo hnungah dahin zalenna zau tak pek a ni.

Allianz Stadium-ah a tir aṭangin Juventus lamin inkhel an thunun a, defender Danilo-a'n box pawn aṭangin kawh zetin goal ban hrulah a pet thlawk nghal pawp. Minute 13-naah Ronaldo ball hloh dawng fuhtu Kulusevski-a'n cool zetin a duhna laiah tak a khung keuh.

Arsenal midfielder hlui Ramsey-a'n inkhel a thunun a, a ball pek dawngtu Ronaldo-a'n bar a pet per dawp - Portuguese forward bawk hian Ramsey cross tho chu hnai tak aṭangin goal ban hrulah a pet chhuak.

Buai nuaih karah defender Bonucci chuan an goal hnihna a khung. Ronaldo dan reng theih a ni lo, hun tawp hma minute hnih chauh awm tawhah Real Madrid forward hlui hian box chhunga Ramsey ball lirh luh chu na zetin goal kilah a pet lut.

A naute khelh danah Juventus manager thar Pirlo a lungawi a, inpawhna ṭha neih a pawimawh thu a sawi. Pirlo chuan, "Hmanni lawkah khan player ka la ni a, chuvangin ka naute dinhmun leh rilru tur ang hi ka hriatthiampui.

"Player leh coach chuan kan mamawh leh harsatna zawng zawng kan inhrilh tawn tur a ni, chu chuan boruak ṭha a siam ang. An duh, thil tum leh khelh chak dan thlengin ka hriat vek a ngai," tiin a naute chu an theihna ang taka khel chhuak turin puih a tum.

Player a nih laiin Pirlo hian sulhnu a nei ṭha a, team enkawl lamah erawh a la patuai hle. Tawnhriat nei loin Old Lady a enkawl a ni a, a chungah mawhphurhna a sang hle bawk - a match hmasa berah chuan ringhlel chunga entute chhanna a pe, a chhunzawn thei dawn em tih chu hunin a hril ang.

Season hmasa lama beisei phak lo Napoli-in season bul an ṭan fuh, an mikhualna ramah Parma chu 2-0 in an luhchhuah. Napoli tan hian Dries Mertens leh Lorenzo Insigne ten goal khat ve ve an khung, kum dang ang bawkin anni pahnih hi player pawimawh an ni leh dawn.

Gennaro Gattuso naute hian season hmasa khan league-ah beisei an phak lo, Coppa Italia-ah erawh Juventus hnehin nomawi an chawi. Season tharah beisei an nei sang a, chutihrualin an defender Kalidou Koulibaly chu chhuak turin thawm a ri ring hle.

Gattuso chuan, "Koulibaly hi a chhuak a nih chuan a pawi ka ti khawp ang, player ṭha leh puitling tak a ni a, kan hnena awm reng turin ka duh. A cham a nih chuan ka hlim khawp ang," tiin Manchester City nena sawizawm defender chungchang a sawi.