Djokovic ropuina hliahtu Wawrinka

Stan Wawrinka chuan world number 1 Novak Djokovic hnehin a vawi khat nan US Open champion nomawi a chawi. Swiss thiampuipa hian Grand Slam nomawi pathum a lakna chiah a ni bawk.

Pathianni zan khan Arthur Ashe Stadium-ah final hi khelh niin darkar thum leh minute 55 zet an inbeih hnuah seeded pathumna Wawrinka hian inkhel inhnehtawk takah 6-7(1), 6-4, 7-5, 6-3 in hnehna a chang. Kum 31-a upa Wawrinka hian Rod Laver, Ken Rosewall, Andre Agassi leh Jimmy Connors te hnung zuiin kum 30 tlin hnua Grand Slam-a vawi khat aia tam champion thei a ni ta.

Kum 1970 khan khatih hun laia kum 35-a upa Ken Rosewall chu US Open-ah hian a lo champion tawh a, Australia hrang hlui hnuah Wawrinka hi he inelnaa champion leh thei upa ber a ni. Major tournament hi 'best of five' hmanga chak zawk zawn a nih ṭhin avangin kum 30 tlin tawh chinah chuan nomawi chawi a har ṭalh tawh.

Wawrinka hian tun ṭum hi Grand Slam final vawi thum a khelhna a ni a, kum 2014 khan khatih hunlaia world number 1 Rafael Nadal hnehin a champion a, nikum khan French Open-ah number 1 Djokovic hnehin kuminah US Open-ah ropuina a chang nawn leh ta. Tennis inelna lian zingah Wimbledon-ah chiah a la champion lo a, he inelnaah hian kum 2014 leh 2015 khan quarterfinal a lo lut tawh.

Stan a dingnghet

Flushing Meadows, New York-ah kum 29-a upa Djokovic-a'n a banrek sawisel deuh chungin a inlan a, hei hi Wimbledon leh Rio Olympic-a a chet chhiat chhan pawh nia ngaih a ni. US Open-ah rin aiin Serbian tlangval a vannei chho a, final lut tur hian darkar kua vel chiah court chhungah hun a hmang - second round leh third round-a a khingpui te inhliam vangin an inhnukdawk.

Hetih lai hian Wawrinka erawh-in final lut tur hian set 27 zet khelin court chhungah darkar 21 leh minute 49 hun a hmang thung a, thahruai a hmang hnem zawk hle ang tih a chiang. Final-ah pawh hian Djokovic-a'n set hmasa ber 6-7 in a lak avangin Stan hi chak lo zawk tura ngaih a ni hman hial.

Amaherawhchu, set hnih-naah Wawrinka a rawn tho chhuak a, a khingpui service chhuhsakin dinhmun ṭha zawkah a ding. Set thumnaah erawh Wawrinka hi 3-0 in a hnufual zawkah a ṭang leh. Mahse, a forehand a nat tluk zeta backhand neih ṭhat chhawr ṭangkaiin Stan hian attacking game a khel zui zel, 'Midang hneh nana ṭha ber chu mahni invenhim hmasak hi a ni' tia lo sawi tawhtu Djokovic a inveng zo lo.

Tun dinhmuna player ngaihven hlawh leh khelṭha tluang ber pahnihte hi vawi 24 an intawnna chiah a ni a, Grand Slam vawi 12 champion tawh Djokovic-a'n sulhnu la nei ṭha zawkin vawi 19 hnehna a chang tawh a, Wawrinka tan tun ṭum hi vawi nga a chakna a ni ve thung.

Season khat chhunga khelh ṭhin Grand Slam pali zingah US Open hi lawmman tamna ber a ni a, mipa leh hmeichhe singles champion hian $3,500,000 (Rs 23,42,37,325) dawngin pahnihna hian $1,750,000 (Rs 11,71,18,662.50) an dawng thung.

A ṭha ber chu

Grand Slam vawi thum champion hlim Wawrinka chuan, "Grand Slam champion nih tum runin ka awm reng lem lo a, court chunga ka luh chiah hian a ṭha thei ang bera khelh ka tum ziah. Zep tur a awm lo a, world number 1 hneh tur chuan kan theihna zawng zawng hman a ngai a ni. Kan inkhelh zawh kha chuan ka ruak huai hian ka inhria - a chhan chu kan inkhelah khan ka rilru leh taksa zawng zawng ka hman vang a ni," a ti.

Third round-ah khan Waw-rinka hi Daniel Evans nen an inhmachhawn a, hemi
ṭum hian Britain tlangvalin match point a hmuh tawh chu Wawrinka hian a lo pawttla tawh. Kum 2011 khan hetiang chiah hian Djokovic hian a lo ti ve tawh a, a champion zui bawk. Wawrinka hi Roger Federer ang tho a backhand nei ṭha a ni a, player ṭha rual nen an hun tawn a inang miau avangin nomawi a chawi tam tawk lo ni pawhin a ngaih theih.

Wawrinka chuan sawi chhun^-zawmin, "Tun hma ang lo takin inkhelh ṭan hma khan ka zam em em a, ka khur hial! Inkhel ṭan hma lawk khan ka coach Magnus Norman nen pawh kan la inbia a, ani leh ka team ten min awmpui tih ka hriat khan ka thlamuang sawt. Theihtawp kan chhuah a nih chuan hlawhltinna hi ban phakah a awm tih ka hriat phah," a ti.

Lawmpuina

US Open vawi hnih cham-pion tawh Djokovic chuan, "Stan ka tihpalh! Ka ding thei lo a ni," tiin set lina an khelh laia a ke na vanga vawi hnih ngawt chawlh a mamawh chhan a sawi.

Djokovic chuan sawi chhun-zawmin, "Stan nang leh i team ka lawmpui che. Nang hi hun pawimawha ṭha tak a khel thei player chu i ni. Champion nomawi chawi kha i phu e," tiin Grand Slam final vawi hniha a hneh loh player a fak.

World number 1 Djokovic hian Grand Slam nomawi 12 chawi tawhin Roger Federer (17), Rafael Nadal (14) leh Pete Sampras (14) te chiah tluk loh a nei. Major tournamnet-ah hian vawi 21 final khel tawhin vawi kua a chak lo zawkah a ṭang. Djokovic hi a theihna leh thiamna enin champion bleh thei a la ni tih a chiang a, chutih rualin player ropui dangte angin kum 30 bawrah a tawp ve mai thei bawk.