Blues chhanhimtu Costa

Liberty Stadium-ah Swansea leh Chelsea te Pathianni zan khan 2-2 in an inhnehtawk a, Diego Costa-a'n goal hnih a khung zarah point khat an hlawh chhuak.

Chelsea tan result ṭha a ni lo a, point hnih hloh hi a tam. Manchester City chiah Premier League khelh meka 100% chak record nei awmchhun an ni.

Welsh club defending ṭhat loh zarah Costa-a'n minute 18-naah a finishing
ṭhat zia a pholang. Swansea-in Gylfi Sigurdsson (59') penalty leh Leroy Fer (62') te goal hmangin an lehthal a, Dutch forward Fer-a'n goal hnihna a khung kawngah Gary Cahill laka a foul ngei nia a lan avangin English defender hi referee Andre Marriner chungah a lungawi lo hle. Cahill hian thla (moon) aṭang pawhin Fer a chet dan hi a hmuh theih tur thu a sawi.

Hun tawpah erawh Blues-in point an sual chhuak tho a, Spain international striker Costa-a'n minute 81-naah Swan-sea defender Kyle Naughton veng mah se nalh takin a bin lut.

Chelsea boss Antonio Conte chuan, "Goal hnihna luh danah khan referee khan tihsual lian tak a nei a ni. Chutihrualin goal khat kan khung hnuah chance
ṭhahnem tak kan hmang ṭangkai thei lo. Kan result-ah ka lungawi lo a, kan khelh danah erawh inkhel hmuhnawm tak kan lantir avangin ka lawm," tiin a sawi.