French champion hmaah Arsenal

Arsenal chuan zanin dar 12:15 hian Champions League-a an group match hmasa ber an khel dawn a, a vawi khat nan French Ligue 1 champion Paris Saint-Germain khelmual Parc des Princes-ah an lenglut ang. Tun hma lamain team pahnihte hi an la intawn ngai loh avangin European foot-ball chanchinah bung thar ziahin a awm dawn.

Arsene Wenger-a'n 13 September, 1996 khan Gunners hi a enkawl ṭan a, a zawnin season 20 chhung zet Champions League a khelh puina tur a ni ta. French manager sulhnu hi a chuanawm a, a ropui lo lai erawh an la champion miah lo hi a ni.

Gunners hian Premier League-a an match hmasa pahnihah point khat chauh hmu mah se Watford leh Southampton te an hneh leh tawh. Saints an hneh ṭum hian forward Alexis Sanches leh midfielder Griant Xhaka te bench-ah ṭhuttir an ni, manager Wenger-a'n a player pahnihte hi PSG hmachhawn turin bul a
ṭan tirin a rinawm.

Valencia aṭanga pound maktaduai 35-a lakluh defender Shkodran Mustafi-a'n Saints lakah rintlak a nih zia a lantir tawh a, striker Lucas Perez erawh beisei anga a hriam tawk loh avangin Olivier Giroud chu a thlan zawk hmel. Aaron Ramsey chu damkawr ni mah se Mesut Ozil, Santi Cazorla leh Alex Oxlade-Chamberlain te an dam thung.

Qatar sumdawng hausa Nasser Al-Khelaifi hnuaia insiam lian PSG erawh tun hma lamin Europe inelna lianah hian inlan tam lo mah se tun hnai season li chhungin quarterfinal an lut vek a, kuminah champion duh vangin coach Laurent Blanc banin Sevilla duhlai Unai Emery an lalut.

Spanish manager Emery-a'n league-ah besei a phak rih lo a, an match hmasa pali aṭanga point sarih hmuin table-ah palina an ni mek. A zawna Europa League champion vawi thum ni thei manager tan zanin hi fiahna bul inṭanna a ni thei ang. PSG hian nipui transfer chhungin striker palian Zlatan Ibrahimovic leh defender rinrawl David Luiz an chan a, an-ni pahnih tlak zo tura hming langsar lakluh an nei lo.

Group A inkhel dangah Swiss club ṭha FC Basel chuan Bulgarian champion Ludogorets an lo mikhual ang. Swiss club zinga Champions League khel hnem ber Basel (6) mikhual tur Ludogorets hi Bulgarian club CSKA Sofia leh Levski Sofia te anga an ram chhunga treble champion thei an nih avangin inkhel hi a hmunawm ang.

Zanin dar 12:15 tho hian Group B lamah Benfica chuan Besiktas an mikhual anga, Italian Serie A pahnihna Napoli chu Dynamo Kiev khelmualah an lenglut dawn bawk.