Alli-a'n Leyton Orient hmachhawn dawn

Tottenham Hotspur-in zanin dar 10:30 hian League Two club Leyton Orient an hmachhawn dawn. Brisbane Road-ah hian khup hliam vangin Tottenham Hotspur-in Gareth Bale an la chhawr thei dawn lo a, PSG nena sawi zawm Dele Alli a khel thung ang.

Spurs manager Jose Mourinho a nih miau avangin season ṭantirh aṭangin an thawm a ring leh tawh hle. London club hian Everton hneh loin bul ṭan mah se an match hnuhnung berah Southampton 5-2 zetin an sawp. 

Portuguese manager hian loan hmangin khawvela player manto ber pawh lo ni tawh Bale a lalet a, Harry Kane leh Son Heung-min te an kawl sa bawk avangin Premier League nomawi chuh thei zingah an tel hial.

Tunah erawh Premier League dah ṭhain League Cup thlir a ṭul a, club dang zawng aiin Spurs tan nomawi a pawimawh lehzual. Lodon club hi Mauricio Pochettino hnuaiah che ṭha viau mah se nomawi an chawi miah lo a, kum 2008-a Dimitar Berbatov te hoin League Cup nomawi an chawi kha inelna lian thama an champion hnuhnung ber a ni.

Spurs-in Jose Mourinho an lak chhan hi nomawi a ni ber a, hemi a nih avang hian Portuguese manager hian League Cup hi a la thu tak ang. Premier League club vanneihna erawh an match hmasa bera an hmachhawn tur hi League Two club Leyton Orient a ni a, squad siksawi a pawi lo turah a ngaih theih.

Mourinho-a'n Saints nen an inkhelh ṭumin squad-ah Alli a dah lo a, hei hian sawi zui a hlawh hle. Inkhelh banah Spurs boss chuan, "Player an tam avangin squad-ah a tel lo. Alli tan Spurs-ah hmun a awm. Chutihrualin kil tinah kan ṭhat a ṭul a, squad-a tel tur hi a chiang ṭhin lo. Hemi atan hian a tawrh kher pawh a ṭul ka ti lo," tiin English midfielder chungchang a sawi a, chhuak thei dinhmunah a ding tih a lang.

Kum 24 mi Alli hi Leyton Orient lakah a theihna pholanna hun pek a ni ang a, Mourinho mit a tlung lo a nih chuan nipui transfer-ah hian chhuak nghal pawh a rinawm. English midfielder hi a dam ṭha a, zanina khelhna hmun a chang lo leh a nih phei chuan Spurs a chhuahsan ngei dawn tihin a sawi theih bawk.