French Open khel tur zingah hri kai an awm

Nimin aṭang khan French Open 2020 chu qualifying round khelh ṭan tur a ni a, player inlan tur zinga panga chu an inhnukdawk - hming langsar tak an ni lo a, an hming leh nihna chu tarlansak an ni lo thung.

Inelna hmachhawn tur hi anmahni bakah coaching staff chu Covid-19 an kai em tih endik hmasak zel an ni a, endik thawh khatnaah hian player pahnih leh an coach-te chuan hri an kai tih hmuhchhuah a ni.

Roland Garros chuan thuchhuah siamin, "Player pahnihin hri an kai a, anni bakah hian coach pawhin hri an kai. Coach nena lo inhnimhnai player dang pathum pawh an inhnukdawk nghal," tiin an sawi. Kar hmasa Ningani aṭang khan mi 900 an endik tawh. Tun kar chhung hian qualifier khelh a ni dawn. September 28 aṭangin inelna pangngai 'main draw' chu khelh ṭan a ni ang, player ranking hniam deuhte tan chuan qualifying hi khelh a ngai ṭhin a ni.